اسلام آباد۔ 14جون (اے پی پی) وزیراعظم عمران خان امن، سوگوی و شونہالی کن 8 ٹکی ایجنڈا ئِ پیش کرسا پارے کہ پاکستان نا خارجہ پالیسی غٹ ملک آتون گچین تعلقداری تا بنداو آ استوار ئِ۔ ایس سی او نا پلیٹ فارم آن ڈیہہ نا شونداری و تین پہ تینی اختلاف آتا پرامن ایسری تون اوار نیزگاری نا چٹفنگ و تین پہ تینی واپار ئِ مون آ دننگ نا بابت ایجنڈا اس پیش کرسا وزیراعظم سلاہ پیش کرے کہ ایس سی او فنڈ و شونداری بینک انا ٹہیفنگ ، دودوربیدگی ، سیل و سواتی راہداری نا جوڑ کننگ، بدعنوانی و وائٹ کالر کرائم نا چٹفنگ کن جامع حکمت علی آ زور شاغنگ نا گرج ئِ ، تصادم ئِ مسترد کرسا ننے امن بقائے تین پہ تینی نا بنداو آ تصادم نا خطرہ غاتے کم کروئی مریک، ڈیہہ نا شونداری کن اوغانستان اٹی امن المی ئِ، پاکستان اوغانستان اٹی اوغان سرکڑدہ غاتا کمک اٹ پرامن ایسری نا است خواہ ئِ۔ اوغان ویل آتا چٹفنگ و امن وایمنی کن چین و روس انا کمکاری نا ستائِ کینہ۔ اوپارے کہ دے ٹکی نیامی و خلیج نا حالیت آتا سوب گڑتی ئِ۔ ایس سی او ئِ ڈیہہ نا شونداری کن ورناو زالبول آتیا خصوصی چکار کننگ نا گرج ئِ تانکہ ورناتے زیات آن زیات روزگار نا وارخواہی تننگ تون اوار اوار زالبول ئِ ہم واکدار جوڑ کننگے۔ ایس سی او وومن فورم و یوتھ کونسل آ سوگو کرسا شونداری و شونہالی کن تین پہ تینی سوگوی ئِ مون آ دننگ مریک ، تین پہ تینی پت اٹی ودکی کن تصادم آن پاناد کننگ نا گرج ئِ۔ جمعہ نادے آ کرغزستان نا دارالحکومت بشکک اٹی شنگھائی کمکار تنظیم (ایس سی او) نا سروکی دیوان آن تران کرسا وزیراعظم عمران خان پارے کہ ایشیاجہانی واپار نا وت اس جوڑ مننگ ئِ و ایس سی او ئِ بایدے مرے کہ او ڈیہہ تون اوار جہانی جھیڑہ غاتا چٹفنگ کن تینا کڑد ئِ ادا کے۔
