اسلام آباد۔ 14جون (اے پی پی) بنجائی وزیر آبی وسیلہ فیصل واوڈا پارینے کہ وزیراعظم عمران خان مسلم لیگ (ن) و پیپلزپارٹی نا دور حکومت اٹ ہلوک آ 24ہزار ارب روپئی وام تا انکوائری کمیشن نا سروک مریک وخت اس کہ قومی ادارہ ایف آئی اے ، آئی بی، ایم آئی، آئی ایس آئی، ایف بی آر ، سٹیٹ بینک دا ادارہ غاتیان اسہ اسہ نمائندہ اس ٹیم انا بشخ مریک، مسکوہی وزیراعظم نواز شریف جوان ئُ کاریم اس کریکہ تو او جاست وپاستی ٹیم انا مون آ پیش متوکہ۔ جمعہ نادے آ پارلیمنٹ ہاﺅس نا پیشن میڈیا تون گپ و تران کرسا بنجائی وزیر پارے کہ الس پاننگ خواہک کہ 24 ہزار ارب روپئی وام دیر کن ہلنگارو دا پیسہ غاتیان ہراہرا ڈٹ ئِ پورو کننگا۔ مسکوہی وزیراعظم نواز شریف نا مار حسن نواز و حسین نواز ملک آن پیشن ئُ وخت اس کہ اسحاق ڈار اونا مار و سالم ہم ملک آن نروک ئُ۔ بنجائی وزیر پارے کہ 24 ہزار ارب روپئی نا وام تا بابت پاناما پیپرز نا جاست وپاست ئِ کروک آجے آئی ٹی وڑانا انکوائری کمیشن اس جوڑ کننگ انگ ئِ ہرانا تینٹ وزیراعظم عمران خان کماشی ئِ کیک وخت اس کہ ایف آئی اے ، آئی بی، آئی ایس آئی، ایف بی آر، سٹیٹ بینک کون آ قومی ادارہ غاتیان اسہ اسہ نمائندہ اس ہلنگک ہرا ٹیم انا بشخ مریک ہرا وام تا بابت جاست وپاست کیک کہ ہراڑے خڑچ مسر و داکہ کس اسے نا جیب اٹی تو افس۔ فیصل واوڈا پارے کہ پاناما پیپرز اٹی جے آئی ٹی نواز شریف آن جاست وپاست کرے اگہ او جوان ئُ کاریم اس کریکہ تو ہمووخت آ جاست وپاستی ٹیم انا مون آ تخاکہ۔ اسحق ڈار اونا مار و سالم ئِ وطن آ پدی اتنگک۔
