اسلام آباد۔ 14جون (اے پی پی) قومی اسمبلی ٹی تران اکن اولیکو وار اپوزیشن لیڈر ئِ ڈائس نا فراوانی آ حکومتی باسک آک اسپیکر آن اعتراضی ٹک انا خواست کریر۔ جمعہ نادے آ قومی اسمبلی نا دیوان اسپیکر اسد قیصر نا کماشی ٹی بناکرے۔ اوایوان آن باسک آتا رخصت نا درخواست آتا منظوری ئِ ہلنگ آن پد ایجنڈاغا ساڑی بروک آ مالی سال 2019-20 ءنا بجٹ آ شرہ نا بنائِ کننگ کن فلور اپوزیشن لیڈر شہباز شریف نا حوالہ کرے تو حکومتی باسک آک تینا نشست آتیان بش مسر و اسپیکر آن اعتراضی ٹک انا خواست ئِ کریر ہراڑ ااسپیکر وار اوار اوفتے تاکید کرے کہ او تینا نشست آتیا تولر و او شہباز شریف ئِ پارسا کرے کہ او تینا تقریر نا بنائِ کے ولے او اسپیکر آن ہاﺅس ان آرڈر کننگ نا خواست کرے۔ اوکان پد ڈاکٹر شیریں مزاری ئِ اعتراضی ٹک آ ہیت کننگ نا موکل تننگا تو ڈاکٹر شیریں مزاری پارے کہ اپوزیشن لیڈر ئِ وخت اس ہم ڈائس تننگتنے اول ٹی ٹی نا ورندی ئِ ایتے ولدا نن اودے ہیت کننگ کن الینہ۔ دا استحقاق غٹ ئِ ایتے۔ اسپیکر پارے کہ نما سینئر لیڈر شپ ئِ ہم ڈائس ایتنہ ہرادے ضرورت مریک اودے ڈائس ایتنہ۔ راجہ پرویز اشرف اعتراضی ٹک آ پارے کہ حکومتی باسک آک زمواری نا درشانی ئِ کیر اگہ دا شورشرابہ کیرہ تو ہاﺅس نا تقدس نا خیال ئِ دیر تخک۔ حکومت اپوزیشن ئِ کنٹینر تننگ نا پیش کش کننگ ئِ ولے اپوزیشن ئِ اسہ ڈائس اس تننگ ہم برداشت کننگ کتوس۔ دُن ئُ رویہ وخت اس کہ خنتنون۔ باسک آک پارلیمانی ادب ئِ پہہ مریر ۔ داوخت آ حکومتی باسک آک پدریسہ تینا نشست آتیا سلسا ہیت کرسا کریر ہراڑا اسپیکر دیوان ئِ دہ منٹ اسکان پد بٹے۔ ولے دیوان دُوارہ بناکرے تو حکومتی باسک آک اسہ وار ولدا تینا نشست آتیابش مسر و ایوان اٹی شورشرابہ کریر ہراڑا اسپیکر دیوان ئِ دوبجہ اسکان پد بٹے۔
