حکومت و اپوزیشن چیف الیکشن کمشنر و الیکشن کمیشن نا باسک آتا تعیناتی کن شش، شش شخصیت آتا کوائف آتے اسہ ایلو نا حوالہ کریر

اسلام آباد۔ 12جون (اے پی پی) چیف الیکشن کمشنر و الیکشن کمیشن نا باسک آتا تعیناتی کن پارلیمانی کمیٹی ٹی حکومت و اپوزیشن شش، شش شخصیت آتا کوائف آتے اسہ ایلو نا حوالہ کریر، کمیٹی نا بروک آ دیوان 19 جون آ دُوارہ مریک۔ کمیٹی نا دیوان چارشنبے نادے آ پارلیمنٹ ہاؤس اٹی بنجائی وزیر پارلیمانی امور ڈاکٹر شیریں مزاری نا کماشی ٹی مس۔ دیوان اٹی بلوچستان و سندھ انا الیکشن کمیشن نا باسک آتا تقرری نا بابت سلابت کننگا۔ دیوان اٹی بنجائی وزیر پارلیمانی امور اعظم خان سواتی، سید خورشید احمد شاہ، مرتضیٰ جاوید عباسی،سینیٹر مشاہد اللہ خان، وزیر مملکت پارلیمانی امور علی محمد خان، باسک قومی اسمبلی شاہدہ اختر علی و محمد میاں سومرو ئسک بشخ ہلکر۔ دیوان اٹی حکومت و اپوزیشن نا کنڈآن سندھ و بلوچستان نا الیکشن کمیشن نا باسک آتا تعیناتی کن شش، شش شخصیت آتا پن تا فہرست ءِ پیش کننگا، کمیٹی نا بروک آ دیوان 19 جون آ دُوارہ مریک۔ یات سلے کہ خصوصی پارلیمانی کمیٹی 12باسک آتیا تالان ءِ ہرافتیان ہشت انا قومی اسمبلی و چار انا سینیٹ تون ءِ۔ کمیٹی ٹی حکومت و اپوزیشن نا باسک آتا کچ بریبر ءِ۔