بلوچستان نا خشک سالی آن زہمی علاقہ غاتے ٹی خور انا کمتی نا سوب ناجوڑی تا گواچی مروک آ بندغ آتے کن جہانی ادارہ جان جوڑی نا کنڈآن محکمہ جان جوڑی بلوچستان ءِ دوائی تا فراوانی بے کچ جوان و انسانیت دوست ءُ گام گیج اسے، وزیراعلیٰ بلوچستان جام کمال خان

کوئٹہ۔ 12جون (اے پی پی) وزیراعلیٰ بلوچستان جام کمال خان و وزیر جان جوڑی میر نصیب اللہ مری جہانی ادارہ جان جوڑی نا کنڈآن تروک آ دوائی تا گام گیج نا ستاءِ کرسا پارینو کہ بلوچستان نا خشک سالی آن زہمی علاقہ غاتے ٹی خور انا کمتی نا سوب ناجوڑی تا گواچی مروک آ بندغ آتے کن جہانی ادارہ جان جوڑی نا کنڈآن محکمہ جان جوڑی بلوچستان ءِ دوائی تا فراوانی بے کچ جوان و انسانیت دوست ءُ گام گیج اسے، صوبائی حکومت غٹ جہانی ادارہ جان جوڑی و ایلو درملکی ادارہ غاتے وخت آ رسپانس و شاری تا کمک ءِ کننگ آ خراج تحسین پیش کیک، جہانی ادارہ جان جوڑی سیکرٹری جان جوڑی حکومت بلوچستان ءِ صوبہ نا خشک سالی آن زہمی علاقہ غاتے ٹی خور انا کمتی نا سوب ناجوڑی تا گواچی مروک آ بندغ آتے کن دوائی فراوان کرے۔ سرجم حوال آتارداٹ جہانی ادارہ جان جوڑی نا کنٹری ہیڈ ڈاکٹر مائیکل سیکرٹری محکمہ جان جوڑی بلوچستان حافظ عبدالماجد تون اونا دفتر اٹی اوڑدہی کرے داوخت آ جہانی ادارہ جان جوڑی بلوچستان نا نمائندہ ڈاکٹر داؤد ریاض وخت اس کہ محکمہ جان جوڑی نا کنڈآن ڈاکٹر ذوالفقار و ڈاکٹر خالد قمبرانی ساڑی ئسر، جہانی ادارہ جان جوڑی نا کنٹری ڈاکٹر مائیکل سیکرٹری جان جوڑی حافظ عبدالماجد ءِ خشک سالی آن زہمی علاقہ غاتے ٹی خور انا کمتی نا سوب ناجوڑی تا گواچی مروک آ بندغ آتے کن وافر کچ اٹی دوائی فراوان کرے و زہمی علاقہ غاتا شار تیکن پین دوائی تننگ نا باوری کرفے۔ داوخت آ سیکرٹری جان جوڑی حکومت بلوچستان حافظ عبدالماجد جہانی ادارہ جان جوڑی نا بلوچستان اٹی کروک آ گام گیج آتا ستاءِ کرے و اومیت پاش کرے کہ صوبہ لشیمنیا تون اوار ایلو خراب انگا ناجوڑی تا چٹفنگ اٹ جہانی ادارہ جان جوڑی بلوچستان حکومت تون پبی کمک کیک۔ اوپارے کہ بلوچستان نا پسماندہ ضلع غاتے ٹی جان جوڑی نا آسراتی تننگ اٹ جہانی ادارہ جان جوڑی نا کمک نا گرج ءِ ہراڑے نئے بیرہ دوائی بلکن ٹیکنیکل ٹیم و محکمہ جان جوڑی ٹی اصلاحات اٹی جہانی ادارہ جان جوڑی نا کمک درکارمریک انتئے کہ وزیراعلیٰ بلوچستان جام کمال خان و وزیر جان جوڑی حکومت بلوچستان میر نصیب اللہ مری نا وژن ءِ مون آ درسا صوبہ نا غٹ ضلع غاتے ٹی بنداوی جان جوڑی نا آسراتی تا فراوانی ٹی محکمہ جان جوڑی اہم کڑد ادا کننگ ءِ تانکہ بلوچستان نا غٹ علاقہ غاتے ٹی رہینگوک آ بندغ آتے جان جوڑی نا بنداوی آسراتی تا وخت آ تننگ ممکن مرے و خراب انگا مرض آک چٹر۔داکان بیدس وزیراعلیٰ بلوچستان جام کمال خان و وزیر جان جوڑی میر نصیب اللہ مری جہانی ادارہ جان جوڑی نا کنڈآن زہمی ضلع غاتا شاری تیکن دوائی تا فراوانی نا ستاءِ کریر و محکمہ جان جوڑی نا کنڈآن کروک آ گام گیج آتیا است جمی نا درشانی ءِ کریر۔