اسلام آباد۔ 11جون (اے پی پی) وزیراعظم نا خصوصی کمکار حوالکاری و شینکاری ڈاکٹر فردوس عاشق اعوان پارینے کہ آئین نا حکمرانی و کانود نا بالادستی نا سفر مون آ ہنسا کیک، مستین اٹ حکومت آک کانود نا تینا مرضی اٹ تشریح ءِ کریر، عمران خان قوم اتون وعدہ کریسس کہ ملک اٹی کانود نا تشریح جتا جتا مفک، ملک اٹی اسہ وڑ کانود وزیراعظم عمران خان نا وژن ءِ، اِرابھلا شخصیت آتا کانود نا تابع بننگ مثبت ءُ پیش رفت اسے، بروک آ مالی سال 2019-20 ء نا بجٹ امیر و غریب نا نیام اٹ بریبری و چندر نا گام گیج آتون گنڈنگانے، بجٹ الس دوست پالیسی تا عکاس مریک۔ او سے شنبے نادے آ پارلیمنٹ ہاؤس نا پیشن میڈیا تون گپ و تران کریکہ۔ وزیراعظم نا خصوصی کمکار اطلاعات و نشریات ڈاکٹر فردوس عاشق اعوان پارے کہ 70 سال آن واکدار خلقت ملک ءِ یرغمال کریسرو کانود نا تشریح ہم مرضی اٹ کرساہِننگا۔ وزیراعظم عمران خان قوم اتون وعدہ کریسس کہ ملک اٹی کانود نا تشریح جتا جتا مفک، اینو حکومت کانود آ عملداری آن الس نا است ءِ کٹانے، واکدار شخصیت آتے کانود نا تابع اتنگ و عدلیہ نا آجوئی عمران خان نا تغ اس ئس۔ ملک اٹی کانود نا بالادستی مریک، نن اومیت کینہ کہ ملک اٹی آئین نا بالادستی و کانود نا حکمرانی نا سفر ہنداوڑ مون آ ہنسا کیک۔ اوپارے کہ ہراتم ادارہ غاک سوگو و کانود نا حکمرانی مرے تو غلطی نا گنجائش مفک و ہنداوڑ ملک اٹی ہر تپہ غان تعلق تخوک آڑکن کانود بریبر مریک۔ اوپارے کہ وزیراعظم عمران خان نا وعدہ غاتا پوروی نا کنڈا اینو اولیکو گام ءِ، ملک اٹی بدعنوانی ٹی اوار بندغ، جماعت، تنظیم و ٹولہ غاتے کانود نا تابع کننگ حکومت نا اولیت ءِ۔ اوپارے کہ بجٹ اٹی ریلیف تننگ و مشکل آتیان کشنگ کن گام گیج کننگانے۔ بروک آ مالی سال انا بجٹ اٹی الس ءِ ریلیف تننگ تون اوار اوار زرکار، صنعت کار، وسیلہ تخوک آ تپہ غاتے معاشی روڈ میپ اٹ حصہ دار کننگانے تانکہ مستین اٹ ملک اٹ مروک آ عدم توازن ءِ گچین کننگے و بجٹ امیر و غریب نا نیام اٹ توازن ءِ المی کننگے۔وزیراعظم نا خصوصی کمکار ڈاکٹر فردوس عاشق اعوان پارے کہ پاکستان ءِ شونہال و شون ہلوک کننگ کن بجٹ کمکار مریک، میڈیا ءِ بایدے مرے کہ او السی فائدہ غاتے کن جہد کروک آتون سلے نہ کہ ملک ءِ پلوک آتون سلے، اومیت ءِ میڈیا الس نا مشکل آتا تدارک کن حکومت نا مخ تفی ءِ کیک۔ پاکستان ءِ مشکل آتیان کشنگ کن غٹ ءِ کڑد ادا کروئی مریک۔ اوپارے کہ حکومت بجٹ نا بابت مثبت سلاہ تیا عملدرآمد کن لائحہ عمل اس پک کیک۔ اسہ سوج اسے نا ورندی ٹی ڈاکٹر فردوس عاشق اعوان پارے کہ مولانا فضل الرحمان تینا خن تے اسلام آباد نا جاگہ غا اسلام آ تخے، مولانا فضل الرحمان نا سوچ اسلام آباد اسکان آخا عالم اسلام اسکان بایدے مرے۔ اوپارے کہ حکومت مخالف آتا ہر چیلنج نا ورندی ءِ تننگ نا طاقت تخنہ، حکومت تینا زمواری تے پورو کننگ ءِ، اپوزیشن تینا زمواری تا احساس ءِ کے۔ اوپارے کہ بجٹ حکومت اسے نا آخا بلکن ملکی فائدہ و الس نا ءِ۔ اسہ سوج اسے نا ورندی ٹی اوپارے کہ عدالت آک خلقت نا مون آن نقاب ءِ شیف کریر، اسحاق ڈار ملک ءِ وام تے ٹی بٹسا ہنا۔ اوپارے کہ زوت معیشت تینا نت تیا سلک۔ اسہ سوج اسے نا ورندی ٹی او پارے کہ پاک فوج ثابت کرے کہ او الس کن مدام قربانی تسنے، ملکی سول ادارہ غاتے ٹی اصلاحات کننگ نا کوشست کننگ انگ ءِ۔
