اسلام آباد۔ 11جون (اے پی پی) بنجائی وزیر سائنس و ٹیکنالوجی چوہدری فواد حسین پارینے کہ حکومت ملک اٹی احتساب نا سوگو ءُ بنداو اس تخنگ نا وعدہ ءِ پورو کرینے، مسکوہی وزیراعظم نواز شریف، مسکوہی صدر آصف علی زرداری وحمزہ شہباز آزاد عدلیہ نا پرمان تیا دزگیر کننگانو، خالص میرٹ نا بنداو آ دزگیری کننگانے و دانا پد اٹ ہچ ءُ سیاسی مسخت اس اف، کیس آتے پی ٹی آئی درج کتویسس بلکن پیپلزپارٹی و مسلم لیگ (ن) اسہ ایلو نا برخلاف درج کریسر، عمران خان نا حکومت کرپٹ عنصر آتا احتساب ءِ کننگ کن بیرہ ادارہ غاتے سازگارچاگڑد اس فراوان کرینے۔ سے شنبے نادے آ داڑے پارلیمنٹ ہاؤس نا پیشن میڈیا تون گپ و تران کرسا کرے، بنجائی وزیر سائنس و ٹیکنالوجی پارے کہ وزیراعظم عمران خان کرپشن نا برخلاف احتساب کن اسہ سازگار چاگڑد اس تسنے، سسٹم نا احتساب برجاءِ و مون آ ہِننگ ءِ۔ اوپارے کہ حمزہ شہباز شریف 26ملین ڈالر پیشن نا ملک آ گدریفے، اول پیسہ غاتے پیشن گدریفنگاولدا پدی اتنگا۔ سوگو احتساب مننگ ءِ، سیاسی انتقام اس اف، مچ آ پیسہ غاک 25 اکاؤنٹ آتا کمک اٹ پیشن نا ملک آہنارہ۔ اوپارے کہ پاکستان نا خلقت وونٹ ءِ شرف تس ولے داخلقت الس ءِ فائدہ تتوس۔ اوپارے کہ اپوزیشن بجٹ آ تنقید کننگ ءِ، بیرہ کرپٹ آک ہی بجٹ آ تنقید کیرہ۔ فواد چوہدری پارے کہ پنچ ہزار اکاؤنٹ ایف آئی اے چیک کرے وخت اس کہ مچ آ پیسہ غاک 31 اکاؤنٹ آتے ٹی ہنارہ۔ سندھ انا غریب خلقت نا پیسہ غاک جتا ملک آتیا ہنارہ و (ن) لیگ نا مچ آ پیسہ غاک لندن آ ہنارہ ہرا پیسہ غاتے پاکستان نا غریبی ءِ چٹفنگ کن بروئی ئس اولندن نا بینک آتیا ہنار۔
