بنجائی وزیر پاور و پٹرولیم عمر ایوب خان نا جاپانی سفیر کونینوری متسودا تون گپ و تران

اسلام آباد۔ 11جون (اے پی پی) بنجائی وزیر پاور و پٹرولیم عمر ایوب خان ملک اٹی بجلی نا بشخ وپانٹ نا نظام اٹی ویلنگ و بجلی نا پرائیویٹ مارکیٹ نا جوڑ کننگ نا خوشخبری ءِ بنفے، پرائیویٹ بجلی نا مارکیٹ آن صارف و بجلی جوڑ کروک آ ہڑتوم آک فائدہ ہرفنگ کیرہ، شون ہلوک ملک آتے ٹی داوڑ نا مارکیٹ آک مست آن کاریم کننگ ءُ، صارف آتا مرضی مریک کہ تینا پک کروک ریٹ آ ہر بجلی جوڑ کروک آڑان بجلی ہلنگ کیک۔ پاکستان اٹی بجلی نا بشخ وپانٹ نا ساڑی آ نظام، حکومت نا ملکیت ءِ دادے ویلنگ کن دوئی کننگ آن بجلی نا مارکیٹ جوڑ کننگ اٹ اہم ءُ مزل نا نشان اس طے کننگک۔ سے شنبے نادے آ بنجائی وزیر پاور جاپان نا سفیر کونینوری متسودا تون اوڑدہی ٹی پاکستان اٹی انرجی مارکیٹ و ویلنگ نا بابت معلومدار کرے۔ اوڑدہی ٹی پاکستان و جاپان نا نیام اٹ ساڑی تعلقداری و خاص وڑاٹ انرجی سیکٹر اٹی کمکاری آ است جمی نا درشانی ءِ کننگا۔ اوڑدہی ٹی ساڑی کمکاری ءِ پین مون آ دننگ آ ہم زور شاغنگا۔ عمر ایوب خان جاپان نا سفیر ءِ پاکستان نا انرجی سیکٹر نا بابت معلومدار کرے۔ اوپارے کہ پاکستان نا پوسکن آ قابل تجدید توانائی نا پالیسی داسہ مننگ نا خڑک ءِ ہراٹی ملک اٹی داسیکٹر اٹی زرکاری نا وارخواہیک ودرہ، ہنداوڑ زرکاری ءِ ہم پیدوار و بھاز جوان ءُ ریٹرن اس ملک۔ بنجائی وزیر جاپان نا سفیر ءِ گردشی وام تا زیات مننگ ءِ کم کننگ و بالکل چٹفنگ نا پلان نا بارواٹ ہم معلومدار کرے۔ اوپارے کہ دا گام گیج آتا سوب آن زرکار آتا پت ودانے۔ کونینوری مستودا عمر ایوب خان ءِ سال آتیان پد ملک اٹی رمضان نا مقدس انگا تُو اٹی بلاتعطل بجلی نا فراوانی آ مبارکبادی تس۔ اوبجلی و گیس دُزی نا برخلاف بناکروک آ مہم آ ہم است جمی نا درشانی ءِ کرے ہرانا سوب ملک انا تاریخ اٹی اولیکو وار ریکارڈ ریونیو و ریکوری کننگانے۔ جاپانی سفیر بنجائی وزیر پاور پٹرولیم ءِ معلومدار کرے کہ جاپان نا چندی کمپنی بشمول مستوبشی پاکستان نا انرجی سیکٹر اٹی جتا پروجیکٹ سرانجام تننگ ءِ۔ اوپارے کہ بھاز انگا جاپانی کمپنیک پاکستان نا انرجی سیکٹر اٹی است خواہی ہلنگ ءُ و داڑے زرکاری پلان کننگ ءُ۔ جاپانی سفیر بنجائی وزیر ءِ این ٹی ڈی سی و جے آئی سی اے(جائیکا) نا نیام اٹ ملک انا ٹرانسمیشن ماسٹر پلان آ جاری کاریم نا بارواٹ معلومدار کرے۔