مالی سال 2019-20ءنا صوبائی بجٹ اسہ الس دوست بجٹ اس مننگ تون اوار اوار حقی وڑاٹ الس نا است خواہی تا ترجمانی ئِ کیک، وزیراعلیٰ بلوچستان جام کمال خان

کوئٹہ 10جون (اے پی پی) وزیراعلیٰ بلوچستان جام کمال خان پارینے کہ مالی سال 2019-20ءنا صوبائی بجٹ اسہ الس دوست بجٹ اس مننگ تون اوار اوار حقی وڑاٹ الس نا است خواہی تا ترجمانی ئِ کیک، مستین نا روایت آتیان اسہ پلو مرسا پی ایس ڈی پی نا تیاری کن محکمہ غاک عملی وڑاٹ کاریم کرینو ، بروک آمالی سال انا بجٹ آن الس نا حکومت و حکومتی ادارہ غاتیا پت سوگو مریک ، داخیال آتا درشانی ئِ او بجٹ نا تیاری ،سلاہ و صوبائی کہول انا سلاہ ئی میگا پروجیکٹ آتے حتمی دروشم اس تننگ کن اڈ ہلوک آ بڑزکو کہولی دیوان اٹی کرے ، صوبائی وزیر خزانہ میر ظہور احمد بلیدی، ایڈیشنل چیف سیکریٹری ڈ ٹ بندی و شونداری ، سیکریٹری خزانہ و ایلو تعلقدار کمامدارآک دیوان اٹی ساڑی ئسر ہرافتا کنڈآن دیوان ئِ اینخو نا مالی سال نا ترمیم مروک پی ایس ڈی پی و بروک آ مالی سال نا سلاہ ئی پی ایس ڈی پی نا بارواٹ حوال تننگا ، وزیراعلیٰ پارے کہ صوبائی حکومت نا پبی کوشست ئِ کہ پوسکن آ مالی سال انا بجٹ گدرینگوک آ دور انا بجٹ آن جتا و گچین مرے ہرا الس نا است خواہی تا عکاس و اوفتا معاشی رکھ انا ضامن مرے ،اوپارے کہ داہیت است جمی نا سوب ئِ کہ بجٹ نا تیاری ٹی غٹ معاملہ غاتا سنجیدگی اٹ جا چ ئِ ہلنگانے ، دیوان اٹی بروک آ مالی سال انا شونداری پروگرام اٹی ہمو شونداری ڈٹ آتے اولیت تننگ نا فیصلہ کننگا ہرافتیا عملدرآمد آن نیزگاری نا چٹفنگ ، ہندی کہول آمعاشی سرجزآتے ٹی ودکی ، روزگار نا گچین وارخواہی تا فراوانی ، پیداواری بشخ آتا شونداری و صوبہ نا وسیلہ غاتے ٹی ودکی نا کمک اٹ اودے خودانحصاری نا کسر آ روا ن کننگ ممکن مننگ کیک ، ڈٹ آتے ٹی جان جوڑی ، تعلیم، انسانی وسیلہ، اسکل ڈویلپمنٹ، مواصلات، کشت و کشار، ماہی گیری، معدنیات، لائیواسٹاک، دیر، توانائی و سیل و سوات کون آ بشخ آتا شونداری ئِ اولیت دوئی مریک ، پی ایس ڈی پی ٹی محکمانہ وڑاٹ تیار کروک آ ڈٹ و حلقہ وار اسکیم تے ہم اوار کننگک ، دیوان اٹی بلوچستان نا کشاری ،سمندری و معدنی پیداوار نا مارکیٹ اسکان رسینگ و اونا ویلیو ایڈیشن کن کولڈ اسٹوریج، پیکنگ، گریڈنگ تون اوار ایلو آسراتی تا فراوانی نا ڈٹ آتیا عملدرآمد کننگ وخت اس کہ داڈٹ آتے ٹی پبلک پرائیویٹ پارٹنر شپ ئِ مون آ دننگ آن ہم امنا کننگا ۔