بیجنگ۔ 10 جون (اے پی پی) وزیراعظم عمران خان و چین نا صدر شی جن پنگ نا نیام اٹ ہندا ہفتہ کرغزستان نا شار بشکیک اٹی مروک آ شنگھائی کمکار تنظیم (ایس سی او) نا دیوان اٹی اوڑدہی ٹی علاقائی و جہانی معاملہ غاتیان بیدس پاک چین تعلقداری تے مون آ دننگ نا بابت گپ و تران کننگک۔ داہیت ءِ چین نا نائب وزیر خارجہ ژینگ ہان ہوئی دوشنبے نادے آ تینا اسہ بیان اسے ٹی پارینے۔ اوپارینے کہ ہڑتوم آ راہشون تا اوڑدہی ٹی ہڑتوم آ کنڈآتا تعلقداری تا مون آ دننگ آ خصوسی چکار کننگ تون اوار اوار جہانی و علاقائی معاملہ غاتیا سرجم گپ و تران مریک۔ چین نا صدر شی جن پنگ نا کرغزستان و تاجکستان نا دورہ غاتیا حوال اٹی ”اے پی پی“ نا نمائندہ نا کنڈآن ہریفوک آ اسہ سوج اسے نا ورندی ٹی اوپارے کہ پاکستان و چین نا راہشون تا اوڑدہی تا بست و بند آتیا گپ و تران کننگ انگ ءِ اوپارے کہ وزیراعظم عمران خان اینخو نا سال چین نا دورہ ءِ کریسس و چینی صدر تون اوڑدہی ہم کریسس ہراٹی پاک چین ہڑتوم آ کنڈآتا تعلقداری تتون اوار علاقائی ویل و دہشت گردی نا چٹفنگ نا بابت گپ و تران کننگاسس۔ اوپارے کہ بیلٹ اینڈ روڈ فریم ورک انا رداٹ ننا تعلقداریک ترندی اٹ سوگو مننگ ءُ۔ وخت اس کہ دہشت گردی نا چٹفنگ کن ہم نن اسہ ایلو تون کمک کننگ اُن۔ اومستی پارے کہ ہڑتوم آ ملک آتا سوگو تین پہ تینی تعلقداریک نتیجہ خیز ثابت مننگ ءُ و دافتیان ہڑتوم آ ملک آتا معیشت آتاشونداری ٹی کمک تون اوار اوار علاقائی شونداری و سلامتی نا مون آ دننگ آہم مثبت زہم تمانے۔ میڈیا ءِ حوال ترسا اوپارے کہ صدر شی جن پنگ کرغزستان نا سرکاری دورہ ءِ کیک و ایس سی او نا بشکیک اٹی مروک آ 12آن 14 جون نا 19 می سرکڑدہ ہی دیوان اٹی بشخ ہلیک۔ اوپارے کہ چینی صدر تاجکستان ن شار دوشنبے ٹی مروک آ اشیاء ٹی تین پہ تینی کمکاری و پت اٹی ودکی(سی آئی سی اے) نا بابت اڈ ہلوک آ پنچ می کانفرنس اٹی ہم بشخ ہلیک و او 14آن 16جون آ سرکاری دورہ غامریک۔ داوخت آ روایتی و غیر روایتی اوڑدہی و ہڑتوم آ کنڈآتا مذاکرات اٹی ساڑی مننگ آن بیدس کیہی معاہدہ غاتیا دستخط و اعلامیہ غاتا ہم گمانی ءِ۔ چین نا نائب وزیر خارجہ پارے کہ صدر شی جن پنگ نا دورہ غان ایس سی او و سی آئی سی اے نا نیام اٹ تین پہ تینی کمکاری ءِ مون آ دننگ اٹ کمک رسینگک۔ اوپارے کہ چینی صدر نا دورہ غاتے ٹی بیلٹ اینڈ روڈ گام گیج نارداٹ چین، کرغزستان و تاجکستان نا تین پہ تینی کمکاری ءِ مون آ دننگ و اقتصادی تعلقداری تے ودفنگ تون اوار اوار الس نا الس تون رابطہ غاتے ودفنگ اٹ ہم کمک رسینگک۔ اوپارے کہ ایس سی او نا 8 باسک ملک آک، 4 مبصر ملک آک و 6 مذاکراتی شریدار ملک آک دیوان اٹی بشخ ہلیرہ۔ تنظیم نا باسک ملک آتے ٹی چین، پاکستان، روس، بھارت، کرغزستان، قزاخستان، تاجکستان و ازبکستان اوارو ہرا جہانی معیشت اٹی 20 درسد آن زیات وخت اس کہ جہانی آبادی ٹی 40 درسد نا حصہ دار ءُ۔
