گدرینگوک آ دہ سال اٹی پاکستان نا کڑزآک 6 ہزار ارب روپئی آن 30 ہزار ارب روپئی اسکان سرمسر
سالانہ جمع مروک آ چار ہزار ارب روپئی خراج آن اِرا ہزار ارب روپئی ہمو کڑزآتا قسط آتے تننگ آ خڑچ مریرہ، ایلو سلوک آ پیسہ غاتیان ملک انا خڑچہ غاک پورو مفسہ
اسلام آباد۔ 10 جون (اے پی پی) وزیراعظم عمران خان الس آن خواست کرینے کہ تینا میرات آتے پاش کننگ نا اسکیم آن فائدہ ہرفسا ملک ءِ اونا نت تیا سلنگ، خلقت ءِ غریبی آن کشنگ و تینا چناتا آخبت ءِ رکھ کننگ اٹ کمک کیر ہراوخت اسکان نن خراج تفنہ ننا ملک مون آ ہِننگ کپک، بے پنی میرات، بینک اکاؤنٹ و پیشن تخوک آ پیسہ غاتے پاش کننگ نا 30جون اسکان وخت ارے، اوکان پد موقع ملیپک، پاکستانی تا پیشن نا ملک میرات و بینک اکاؤنٹ آتا معلومداری نا معاہدہ مسنے۔ عظیم ءُ قوم اس مننگ کن ننے تینے بدل کروئی مریک۔ دوشنبے نادے آ پاکستان ٹیلی ویژن و ریڈیو آ قوم انا پن آ کلہو اسے ٹی وزیراعظم عمران خان پارے کہ گدرینگوک آ دہ سال اٹی پاکستان نا وامک 6ہزار ارب روپئی آن ودسا 30 ہزار ارب روپئی اسکان سرمسر دافتا الس ءِ دا نسخان مسنے کہ نن سالانہ چار ہزار ارب روپئی ہرا خراج آتے جمع کینہ اوفتیان نیمہ یعنی اِرا ہزار ارب روپئی ہمو وام تا قسط آتے تننگ آ خڑچ مریرہ و ایلو سلوک آ پیسہ غاتیان ملک انا خڑچہ غاک پورو مننگ کپسہ۔ اوپارے کہ پاکستانی ہمو قوم ءِ ہرا بدبختی اٹ غٹ آن کم خراج ایترہ ولے خیراب غٹ آن زیات خیرات کیرہ۔ اوپارے کہ ننے اگہ جوزہ بس تو نن سالانہ دہ ہزار ارب روپئی اسکان ہم خراج جمع کننگ کینہ۔ اوپارے کہ ہراوخت اسکان نن خراج تفنہ ننا ملک مون آ ہِننگ کپک۔ بے پنی میرات، بینک اکاؤنٹ و پیشن ناملک آتے اٹ تخوک پیسہ غاتے پاش کننگ نا 30 جون اسکان وخت ارے۔ غٹ آن خواست ءِ کہ میرات آتے پاش کننگ نا اسکیم اٹ بشخ ہلیر۔ بے پنی اکاؤنٹ و بے پن میرات و پیشن نا ملکپاکستانی تا جائیداد آتا معلومداری بننگ ءِ و دا چرجوئی ٹی معاہدہ ہم مسنے۔ ننا حکومت تون ہمو معلومداریک اریر ہرا مہالو اسہ حکومت اسے تون ہم الورہ۔ وزیراعظم پارے کہ تانکسکان قوم اس تینٹ کوشست کپ اللہ تعالیٰ اونا حالیت ءِ بدلیفپک، میرات آتے پاش کننگ نا اسکیم آن فائدہ ہرفبو و ملک ءِ فائدہ ایتبو و تینا چناتا آخبت ءِ رکھ کبو، موقع اس ایتبو کہ ملک ءِ اونا نت تیا سلفن و خلقت ءِ غریبی آن کشن۔
