اسلام آباد۔ 10 جون (اے پی پی) اسپیکر قومی اسمبلی اسد قیصر پارینے کہ چارسدہ ٹی کسفوک آ مسہ ایلم تا وارث آتا انصاف ترفینہ، دوبہ دار آتا دزگیری کن ہروڑنا گام گیج کینہ، ایلم تا وارث آتے کن اسہ پیکج اسے نا پڑو ءِ کننگک۔ داخیال آتا درشانی ءِ او دوشنبے نادے آ قومی اسمبلی نا قائمہ کمیٹی داخلہ نا دیوان اٹی گپ وتران کرسا کرے۔ قائمہ کمیٹی داخلہ نا دیوان کمیٹی نا چیئرمین راجہ خرم نواز نا کماشی ٹی مس۔ دیوان اٹی بنجائی وزیر داخلہ بریگیڈیئر (ر) اعجاز احمد شاہ، آرپی او مردان و کمیٹی نا ایلو باسک آک بشخ ہلکر۔ دیوان آن تران کرسا اسپیکر قومی اسمبلی پارے کہ ننا ایم این ایک ہم ہر مسٹ آ ایلم تا کسفنگ آ گڑتی نا گواچی ءُ، ننے ہرمسٹ آ ایلم تا وارث آتے انصاف ترفوئی ءِ۔ دوبہ دارآتا دزگیری کن ہروڑنا گام گیج کینہ۔ دا ایلم تا وارث آتے کن اسہ پیکج اسے نا پڑو ءِ کننگک، ہرمسٹ آایلم تا کہینگ آن پد اسہ پیر ءُ لمہ اس و چناک سلیسونو دابابت پیکج اس جوڑ کرسا کمیٹی ءِ تننگے۔ داوخت آ وزیر داخلہ بریگیڈیئر (ر) اعجاز احمد شاہ پارے کہ دوبہ دار گیشتر سم کاری نا واقعہ غاتے ٹی اوار مسنے، بنجائی وزیر پارے کہ نن ملائیشیا غان دوبہ دار ءِ اتنگ کن پورو کوشست کننگ اُن۔ اسپیکر اسد قیصر وزیر داخلہ ءِ پارے کہ اوڑتون دا بارواٹ وزارت خارجہ نا انت اپ ڈیٹ اس ارے۔ داوخت آ دیوان آن تران کرسا آرپی او مردان پارے کہ چارسدہ ٹی مسہ ایلم ءِ کسفنگ نامقدمہ ءِ دمدستی نوشتہ کننگا۔ اوپارے کہ درخواست گزار ننا داوخت اسکان نا کارروائی آن است جم ءِ۔ آر پی او پارے کہ داواقعہ نا دہشت گردی تون ہچ ءُ تعلق اس اف۔ آر پی او رپورٹ اٹ پاننگاکہ چنکو ہیت اسے آ ہر مسٹ آ حقی آ ایلم تے اُراغا بٹنگسا بے دڑدی اٹ کسفنگا۔ اوپارے کہ ہرمسٹ آ ایلم تا لمہ و اوفتا چناک درپہ در دوبہ دار آتا دزگیری کن چرینگ انگ ءُ۔ دیوان آن تران کرسا قومی اسمبلی نا باسک فضل محمد خان پارے کہ داوڑنا اسہ واقعہ اس مہالو ہم مسنے، ہراٹی اِرا ایلم ءِ کسفسا اوفتا دوتے نتے و خفتے تڑنگاسس۔
