کوءٹہ ۔ 03 جون (اے پی پی) قلعہ سیف اللہ نا علاقہ ٹی ویگن و ٹرک اسے نا ڈوک لگنگ اٹ 15 بندغ تپاخت کریر وخت اس کہ 20 بندغ ٹھپی مسنو ۔ ڈپٹی کمشنر ڈاکٹر عتیق پارے کہ یک شنبے و دوشنبے نا نیامی نن قلعہ سیف اللہ نا علاقہ علی خیل اٹی کوءٹہ غان ژوب آ ہنوک آ ترند رفتار ویگن و ٹرک اسے نا ڈوک لگنگ اٹ چناو نیاڑی تتون اوار 15 بندغ تپاخت کریر وخت اس کہ 20 بندغ ٹھپی مسر ، تپاخت کروک آتے ٹی سلطان محمد، محمد الیاس ، داءود شاہ، سلطان بی بی ، عصمت، میر حمزہ و ایلوفک اوار ئسر ۔ اوپارے کہ لاش و ٹھپی تے دمدستی وڑاٹ سول ہسپتال قلعہ سیف اللہ غا سرکننگا ہراڑے ڈاکٹر آک ٹھپی تے بنائی طبی امداد تسر ہراڑے گڑاس ٹھپی تا حالیت نازرک ءِ ۔ اوپارے کہ تپاخت کروک آتے ٹی اسہ ہی خاہوت نا 5 بندغ ہم اوارو ۔
