اسلام آباد ۔ 03 جون (اے پی پی) برٹش ایئر ویز نا اولیکو جہاز دوشنبے نا سہب اتون اسلام آباد نا جہانی بالی پٹ آ توس ۔ برٹش ایئرویز دہ سال انا وقفہ غان پد پاکستان کن تینا جہاز آتا چرجوئی ءِ دُوارہ بناکرینے ۔ لندن نا ہیتھروایئر پورٹ آن رادہ مروک آ اولیکو جہاز دوشنبے نا سہب اتون 240 مسافر آتے ہرفسا اسلام آباد نا جہانی بالی پٹ آ سرمسنے ۔ ہوابازی نا وزیر غلام سرو رخان، واپار نا بارواٹ وزیراعظم نا سلاہکار عبدالرزاق داءود ، پیشن نا ملک رہینگوک آ پاکستانی تا معاملہ غاتا خصوصی کمکار ذوالفقار حسین بخاری، ایوی ایشن ڈویژن و برطانوی ہائی کمیشن نا بڑزکو کمامدارآک اسلام آبا د نا جہانی بالی پٹ آ مسافر آتے بخیر کریر ۔ یات سلے کہ ہندا جہاز مسافر آتے اتسا اسلام آباد آن پدی ہیتھروکن ہم رادہ مریک ۔
