اسلام آباد ۔ 03 جون (اے پی پی) بنجائی وزیر ڈٹ بندی شونداری و اصلاحات مخدوم خسرو بختیار پارینے کہ حکومت ملک اٹی تعلیم نا بشخ ءِ پوسکن آ وڑوڈول آتیا اتنگ کن کاریم کننگ ءِ، حکومت وژن 2025 ء نا رداٹ اسکول آ ہنوک آ مسڑ ومارتا تعددی پرخ ءِ چٹفنگ کن کوشست کننگ ءِ و بروک آ پنچ سال اٹی دا پرخ اٹی 50 درسد اسکان کمتی اتنگک و 2025 ء اسکان ہر مسڑ یا مار تعلیم نا زیور آن آراستہ مریک ، حکومت قومی وسیلہ غاتے الس نا راجی آسراتی و ملکی شونداری کن کاریم اٹ اتنگ کن حقیقت پسندانہ حکمت عملی اس اختیار کننگ ءِ ہرانا بھرمک ترندی اٹ مون آ بننگ نا بناءِ کرینو ۔ داخیال آتا درشانی ءِ او تدوک آ دے سینٹرل ڈویلپمنٹ ورکنگ پارٹی نا دیوان آن تران کرسا کرے ۔ اودیوان نا بشخ ہلوک آتے پارے کہ نم پٹ و پول کن ہندن ءُ ڈٹ جوڑ کبو ہراڑان ملک و قوم ءِ فائدہ رسینگے و معاشی بھاریم کم مننگ کے ۔ سینٹرل ڈویلپمنٹ نا دیوان اٹی تعلیم نا بابت 2 ڈٹ پیش کننگا ہراٹی اولیکو ڈٹ مچ آ سندھ اٹی ثانوی تعلیم نا گچینی کن 11533;46;500 ملین روپئی نا خڑچ انا ڈٹ پیش کننگا ہرادے دیوان گڈیکو منظوری کن ایکنک آ گدریفینے ۔ ارٹ میکو ڈٹ پاکستان اٹی انسانی شونداری نا ٹک ءِ گچین کننگ تون اوار اوار پائیدار شونداری نا ہدف آتیا چکار کننگ کن 2995;46;896 ملین روپئی نا ڈٹ پیش کننگا ہرادے دیوان منظور کرینے ۔
