اسلام آباد ۔ 01جون (اے پی پی) اسلامی کمکار تنظیم بیت المقدس تون اوار مقبوضہ فلسطینی علاقہ غاتے ٹی راستکی تے بدل کننگ و اِراریاستی ایسری ءِ نسخان تننگ نا بابت اسرائیل نا ہمو غٹ غیر کانودی گام گیج آتا مذمت ءِ کرسا باسک ملک آتیا زور شاغنگانے او تینا سفارت خانہ بیت المقدس آ منتقل کروک آ ملک آتا برخلاف مناسب گام گیج کیر ۔ ہفتہ نادے آ مکہ مکرمہ ٹی اسلامی کمکار تنظیم نا سروک دیوان نا ایسر آ جاری کروک آ اسیجا اعلامیہ ٹی پرامن بقائے باہمی نا ایجنڈا نا خواست ءِ کرسا دہشت گردی ءِ مذہب اسے تون یا قومیت اسے تون گنڈنگ ءِ مسترد کرینے ۔ اعلامیہ ٹی دہشت گرد تنظیم تا برخلاف سلنگ و دہشت گردی نا لعنت نا مون ءِ توننگ نا اہمیت آ زور شاغنگانے ۔
