اسلام آباد ۔ 01جون (اے پی پی) وزیراعظم عمران خان تون سعودی ولی عہد شہزادہ محمد بن سلمان اوڑدہی کرینے ۔ وزیر اعظم ہاءوس نا کنڈآن جاری بیان نا رداٹ دا اوڑدہی مکہ مکرمہ ٹی چانڑدہ می اسلامی کانفرنس نا سائیڈ لائنز آ مس ۔ سعودی ولی عہد اسلامی کانفرنس تنظیم نا سروک کانفرنس اٹی بشخ ہلنگ کن وزیراعظم عمران خان نا دورہ سعودی عرب آ اودے جم و جوش اٹ بخیر کرے ۔ وزیراعظم روایتی سعودی میزبانی آ ولی عہد نا منت واری ءِ ہرفے و او آئی سی نا کماشی ءِ سنبھالنگ آ سعودی عرب ءِ مبارکباد پیش کرے ۔ ہڑتوم آ راہشونک سیاسی، اقتصادی و واپاری تعلقداری تا ساڑی حالیت آتا جاچ ءِ ہلکر و داہیت آ امنا کریر کہ فروری 2019 ء ٹی ولی عہد محمد بن سلمان نا دورہ پاکستان اٹی کروک آ فیصلہ و خاص کر سپریم کوآرڈنیشن کونسل نا اولیکو دیوان اٹی کروک آ فیصلہ غاتیا عملدرآمد ءِ المی کننگک ۔ وزیراعظم عمران خان موخر ادائیگی تیا پاکستان ءِ پٹرولیم مصنوعات آتا فراوانی نا آسراتی ٹی ودکی آ سعودی حکومت نا منت واری ءِ ہم ہرفے ۔ اوپارے کہ سعودی عرب نا دوستانہ رویہ و پاکستان نا مشکل اقتصاد ی حالیت آتے ٹی وخت آ کمکاری ستاکڑزک ۔ وزیراعظم عمران خان و ولی عہد محمد بن سلمان تین پہ تینی است خواہی نا غٹ معاملہ غاتیا پدریسہ گپ و تران آ ہم امنا کریر ۔
