اسلام آباد۔ 29 مئی (اے پی پی) وزیراعظم عمران خان سعودی عرب اٹی 31مئی 2019ء آ اڈ ہلوک آ 14می او آئی سی سروک دیوان اٹی بشخ ہلیک۔ چارشنبے نادے آ دفترخارجہ نا کنڈآن جاری بیان نا رداٹ سروک دیوان او آئی سی باسک ملک آتے تینا خیال آتا درشانی و اسلامی ملک آتا فائدہ غاتیا مبنی سیاسی، معاشی و سلامتی نا بابت معاملہ غاتیا سجفنگ نا نہادی موقع اس فراوان کننگ نا اہم ءُ پلیٹ فارم اسے۔ وزیراعظم ایلو معاملہ غاتیان بیدس امہ نا سیوت و سخا و یکجہتی نا المی خواست و جموں و کشمیر نا جھیڑہ، اسلام مخالف ودوک آ رجحان، تعلیم و سائنسی شونداری کون آ معاملہ غاتے کن مخ تفی آ چکار کیک۔ 2019ء او آئی سی نا جوڑ کننگ نا 50می سال دے نا سال ہم ارے۔
