لاہور۔ 28 مئی (اے پی پی) چین نا نائب صدر وانگ چی شن خوشگوار یات آتون 3دے ئی پاکستان نا دورہ ءِ پورو وطن آ پدی رادہ مس۔ لاہور بالی پٹ آ وزیراعلیٰ پنجاب سردار عثمان بزدار و صوبائی کابینہ نا باسک آک شرفدار آ مہمان ءِ رخصت کریر۔ روانگی نا وخت آ چین نا نائب صدر نا پاننگ ئس کہ لاہور اٹی ملوک آ مابت ءِ وخت اس ہم است آن دننگ کپرہ، شاندار مہمان نوازی آ وزیراعلیٰ عثمان بزدار نا منت واری ءِ ہرفیوہ، چین شونداری و شونہالی نا سفر اٹی پاکستان تون مست آن سلوک ئس و پین وخت اس ہم سلک۔ تین پہ تینی کمکاری نا پوسکن آ جہت آتیا کاریم کرسا سنگتی ءِ پین بھاز مون آ دینہ۔ وزیراعلیٰ پنجاب شرفدار آ مہمان ءِ رخصت کننگ نا وخت آ پارے کہ لاہور اٹی نا میزبانی ءِ کرسا است ءِ خوشی اس ملانے۔ چین نا نائب صدر نا دورہ پاکستان پاک چین سنگتی ءِ پین سوگو کیک۔ پاکستان و چین نا سنگتی نا لازوال رشتہ اسُل چٹپک، وزیراعظم عمران خان نا دوراٹی پاک چین تعلقداریک پین زیات مننگ ءُ، چین و پاکستان نا نیام اٹ پیار، مابت و کمکاری نا پوسکن ءُ باب اس نوشتہ مننگ ءِ۔ صوبائی وزیر آک راجہ بشارت، سید صمصام بخاری، نعمان لنگڑیال، ڈاکٹر یاسمین راشد، اعجاز عالم، تیمور بھٹی، آشفہ ریاض، عنصر مجید خان نیازی، سمیع اللہ چوہدری، حافظ ممتاز احمد، ہاشم ڈوگر، چیف سیکرٹری، انسپکٹر جنرل پولیس، سیکرٹری اطلاعات، پرنسپل سیکرٹری وزیراعلیٰ و تعلقدار کمامدارآک ہم داوخت آ ساڑی ئسر۔
