پوسکن آ امن ڈٹ و ایران نا حالیت آتیا گپ و تران مریک، پاکستان دا دیوان اٹی تینا نقطہ نظر ءِ پیش کیک، مخدوم شاہ محمود قریشی

اسلام آباد۔ 28 مئی (اے پی پی) وزیر خارجہ مخدوم شاہ محمود قریشی پارینے کہ او آئی سی وزیر خارجہ کونسل نا دیوان اٹی اسہ پوسکن ءُ امن ڈٹ و ایران نا حالیت آتیان ودی مروک آ بے چیٹی و تناؤ آ گپ و تران نا گمان ءِ، پاکستان دیوان اٹی دارداٹ تینا نقطہ نظر ءِ پیش کیک۔ داخیال آتا درشانی ءِ او سے شنبے نادے آ او آئی سی وزیر خارجہ کونسل نا دیوان اٹی بشخ ہلنگ کن سعودی عرب آ رادہ مننگ آن مست میڈیا تون گپ و تران کرسا کرے۔ اوپارے کہ سعودی عرب اٹی اسلامی ملک آتا تنظیم نا دیوان ءِ ہراڑکن وزیراعظم ہم کاہک۔ اوپارے کہ او او آئی سی نا کونسل آف فارن منسٹرز نا دیوان داخاطران ہم اہمیت تخک کہ دا دیوان اٹی دے ٹکی نیامی نا حالیت آتیا گپ و تران کننگک۔ وزیر خارجہ پارے کہ اسہ پوسکن آامن ڈٹ ہرانا ذکر مننگ ءِ داڑاہم دیوان اٹی گپ و تران مریک، ایران نا حالیت آک ہرافتے ٹی بے چیٹی و تناؤ زیات مننگ ءِ دا بابت ہم گپ وتران کننگ نا گمان ءِ۔ اوپارے کہ دا غٹ رداٹ پاکستان دا دیوان اٹی تینا نقطہ نظر ءِ پیش کیک۔ وزیر خارجہ دا ہم پارے کہ دیوان اٹی اونا گڑاس وزیر خارجہ غاتون اوڑدہی ہم پک ءِ او آئی سی نا سیکرٹری جنرل تون ہم اوڑدہی مریک۔ اوپارے کہ کشمیر رابطہ پڑک نا دیوان ہم گمانیءِ ہراٹی کشمیر رابطہ پڑک نا باسک آک تینا نقطہ نظر ءِ پیش کیرہ۔