اسلام آباد۔ 19 فروری (اے پی پی) بنجائی وزیر انسانی حق ڈاکٹر شیریں مزاری پارینے کہ بھارت خوش مف ، ہر بھارتی مہم نا پبی ورندی ءِ تننگک، مودی و ہندوتواایڈیالوجی ءِ دا احساس اف کہ مقبوضہ کشمیر اٹی بھارتی بیدادی نا ردعمل اٹی پلوامہ کون آواقعہ غاک پیش بریرہ، پاکستان آ بے بنداو دوبہ خلنگ آن ویل ایسر مفک، جہانی برادری مقبوضہ کشمیر اٹی بھارتی ریاستی دہشت گردی نا نوٹس ءِ ہلے۔ مقبوضہ کشمیر اٹی بھارتی ریاستی دہشت گردی نا چٹفنگ اسکان ڈیہہ ٹی امن مننگ کپک، مودی و ہندو تواجیس انتہاپسند سوچ انا سوب بھارت اٹی اقلیت آک بے رکھ ءُ۔ داخیال آتا درشانی ءِ او سے شنبے نادے آ انسٹیٹیوٹ آف پالیسی سٹڈیز نا کنڈآن ’’ہنداتواپالیسی و بھارت اٹی اقلیت آتا حالیت زار‘‘ نا بابت سیمینار آن تران کرسا کرے۔ سیمینار اٹی ایگزیکٹو پریذیڈنٹ انسٹیٹیوٹ آف پالیسی سٹڈیز خالد رحمان و ایلو ترانکار آک تران کریر و بھارت نا ہندوتوا پالیسی و انتہاپسندانہ سوچ انا نتیجہ ٹی اقلیت آتا بے رکھ مننگ آ تینا گڑتی تا درشانی ءِ کریر۔ سیمینار آن تران کرسا بنجائی وزیر انسانی حق ڈاکٹر شیریں مزاری پارے کہ دانشور و اسکالر آتے بایدے مرے کہ او سیکولر بھارت نا اسہ کنڈچمبازی ءِ بے نقاب کننگ کن ہندوتوا سوچ انا بابت ریسرچ کرسا راستکی تے اقوام عالم نا مون آ اتیر۔ اوپارے کہ بھارت اٹی مسلمان و عیسائی تتون اوار اسہ اقلیت اس ہم رکھوک اف بلکن مودی و ہندوتوا ہندوتیٹی ہم ذات پات و برادری نا پرخ ءِ تہو تسنے ہراڑان شیفکو ذات انا ہندوک غیر محفوظ مسنو و داڑان بھارت نا دوغلہ پن دنیا نا مون آ بے نقاب مسنے۔ اوپارے کہ مودی نا دور اٹی بھارت اٹی ہندوتوا سوچ ءِ مون آ دننگانے۔ داڑان مچ آ بھارتی راج بے رکھ ءُ۔ اوپارے کہ بھارت اٹی مسلمان تیان بیدس عیسائی و سکھ آتیا ہم بیدادی کننگک، اوفتے مذہبی آجوئی ہم دوئی اف۔ سیمینار اٹی بھلو کچ اسے ٹی دانشورآک ساڑی ئسر۔ داوخت آ ہندو توا، بھارت اٹی ودوک آ انتہاپسندی نا سرحال آن ایئر کموڈور (ر) خالد اقبال نا کتاب نا مون پاشی ہم مس۔
