زالبول ءِ زیزاریفنگ نا بابت کانود ءِ پین گچین جوڑ کینہ
لاہور۔ 19 فروری (اے پی پی) گورنر پنجاب چوہدری محمد سرور پارینے کہ صوبائی کہول آ زالبول ءِ زیزاریفنگ نا بابت کانود ءِ پین گچین کینہ ، بدبختی اٹ زالبول زیراریفنگ آن پد چپ مریرہ ، بھاز وخت زالبول ءِ دفتر آتے ٹی زیزاریفنگک اوفتا معاشی و راجی حالیت آتا فائدہ ءِ ہرفنگک۔ او تدوک آ دے اسہ ہندی ہوٹل اسے ٹی ’’ملازمت کروک زالبول آتا حق‘‘ انا بابت دود آن تران کریکہ۔ گورنر پنجاب پارے کہ زالبول ءِ رکھ بایدے تروئی مرے تانکہ او ملک انا شونداری ٹی اہم کڑد ادا کننگ کیر، اوپارے کہ دا المی مسنے کہ ہندن ءُ پالیسی اس جوڑ کننگے ہرانا رداٹ زالبول بے خوف و خلیس تینا کسبی امور آتے سرانجام تننگ کیر ، ایلو ملک آتیانبار پاکستان اٹی ہم بھاز وخت زالبول ءِ کاریم نا جاگہ غا زیزاریفنگ تون مون تروک مریک، گیشتر زالبول زیزاریفنگ آن پد چپ مریرہ ہرانا سوب آن واقعہ غاتے ٹی ودکی مریک ، گورنر پارے کہ زیزارنگ نا گواچی مروک آ زالبول آک بایدے چپ مفس ،ننے زالبول آتا بابت راج انا سوچ ءِ ہم بدلیفوئی مریک۔ گورنر پارے کہ ننا مسنک جامعہ غاتے ٹی بھاز جوان خواننگ ءُ ، پاکستان نا آخبت زالبول آتا دوٹی ءِ، اوتینا دور برطانیہ ٹی سیاست نا ذکر ءِ کرسا پارے کہ نن برطانیہ ٹی ہم مسلمان زالبول ءِ سیاست اٹی مون آ اتنگ نا کوشست کرین اوٹی 2010 ء ٹی چار مسلمان زالبول باسک پارلیمنٹ مسر۔ چوہدری محمد سرور پارے کہ تینا دودوربیدہ غا سلنگ آن شونداری نا کسر اٹی ہچ ءُ ا ڑاند اس مفک وخت اس کہ برطانیہ ٹی حجاب کروک آ زالبول آک ہم باسک مسر۔ اوپارے کہ زالبول و اقلیت آتون اوار غٹ کانود نا مون آ بریبر ءُ۔ اوپارے کہ ننا ملک اٹی سول سروس، فارن سروس و پولیس سروس تون اوار غٹ ملازمت آتے ٹی زالبول گچین خذمت انجام تننگ ءُ۔ دود آن میڈیم میلینڈا گڈ، جسٹس (ر) ناصرہ جاوید اقبال، بشریٰ خلیق، اعظمیٰ کاردار تون اوار ایلوفک ہم گپ و تران کرسا پاریر کہ پاکستان ساؤتھ ایشیا نا اسٹ انگا ملک ءِ ہراڑے زالبول ءِ زیزاریفنگ نا کانود مہالو جوڑمس، مہالو جنسی ہراسگی ءِ گوجالنگاکہ ولے 2010 ء آن زالبول ءِ زیزاریفنگ نا عمل ءِ کانود نا درجہ تننگا۔ ترانکار آتا پاننگ ئس کہ ورکنگ زالبول ءِ راج اٹی عزت دار چاگڑد اس تننگ بے حد المی ءِ ۔ دود انا ایسری آ گورنر پنجاب چوہدری محمد سرور زالبول ءِ زیزاریفنگ نا برخلاف رپورٹ کننگ نا ویب سائٹ نا بناءِ کرے۔آAN/SMH
