اسلام آباد۔ 19 فروری(اے پی پی) وزیر خارجہ شاہ محمود قریشی وزارت خارجہ نا مڈل ایسٹ ڈویژن، پروٹوکول ڈویژن و جی ایس ڈائریکٹوریٹ نا آفیسر آتے سعودی ولی عہد شہزادہ محمد بن سلمان نا پاکستان نا دورہ ٹی گچین بست و بند آتیا شاباش ومبارکباد ترسا پارینے کہ دورہ ٹی ہڑتوم آ ملک آتا نیام اٹ ہرامعاہدہ غاک مسر او پاکستان و پاکستان نا الس کن بے کچ اہمیت تخرہ۔ وزیر خارجہ سے شنبے نادے آ وزارت خارجہ نا آفیسر آتا شرف اٹی چاہ سے نا بست و بند ءِ کرے۔ دود اٹی سیکرٹری خارجہ تہمینہ جنجوعہ تون اوار وزارت خارجہ نا بڑزکو کمامدارآک ساڑی ئسر۔ وزیر خارجہ پارے کہ او سعودی ولی عہد شہزادہ محمد بن سلمان نا تاریخی بیابخیر نا شاندار بست و بند کننگ آ غٹ آفیسر آتے مبارکباد پیش کیک۔ اوپارے کہ دادورہ ٹی پاکستان وسعودی عرب نا نیام اٹ ہرامعاہدہ غاک مسر او پاکستان وپاکستان نا الس کن بے کچ اہمیت تخرہ۔ وزیر خارجہ پارے کہ وزیراعظم عمران خان نا خواست آ سعودی عرب نا کنڈآن 2107 بندی تا یلہ کننگ نا پڑو و سعودی عرب نا کنڈآن ویزہ فیس اٹی کمتی، خیر سگالی نا ہندن ءُ گام گیج ءُ ہرافتا مچ آ قوم ستاءِ کیک۔
