اسلام آباد۔28جون (اے پی پی): وفاقی تہی کارانی وزیر محسن نقوی ءَ نادرا میگا سینٹر بلیو ایریا ءِ حیرانی ءِ تر ءُ تاب کت کہ ہفتگ ءِ ہفت روچ 24کلاک کار کنت، شہری آنی نیمگ ءَ چہ جوانیں رائے ءِ سر ءَ انچارج ءُ کارندہ آناں مبارک بات دات ءُ گیش محنت کنگ ءِ سر ءَ زور پر دات۔ وزارت داخلہ ءِ نیمگ ءَ چہ جاڑی بوتگیں بیان ءِ رد ءَ نا اُمیتیں تر ءُ تاب ءِ موہ ءَ وزیر داخلہ محسن نقوی ءَ نادر میگا سینٹر ءَ شہری آنی واستہ داتگیں آسراتی آنی سر ءَ چار ءُ تپاسی کتگ ءُ شہری آں گوں گند ءُ نند کتگ کہ آ وتی شناختی کارڈ ءُ ایندگر کاگد جوڑ کنگ ءِ واستہ اتکگ اَنت ءُ ایشانی رد ءُ بند ھم لوٹ اِتگ۔ وزیر داخلہ محسن نقوی ءَ شناختی کارڈ ءُ ایندگر کاگد جوڑ کنگ ءِ وھد ءِ بابت ءَ جست ءُ پرس کت، ایشی ءِ سر ءَ شہری آں میگا سنٹر ءَ داتگیں آسراتی آنی سر ءَ وشھالی ءِ درشانی کت۔ شہریاں گشتگ کہ دگہ صبر کنگ نہ لوٹیت، آہانی نوبت زوت کیت۔ شہری آں تہی کارانی وزیر محسن نقوی ءِ ھم منت واری درشان کت ءُ گوشت کہ کارندہ ھم سک باز کمک کن اَنت، تئی آیگ ءَ گوں جاور ھال سک باز گہتر بوتگ اَنت۔ وزیر داخلہ ءَ شہری آں چہ جوانیں پسو ءِ پد ءَ نادر میگا سینٹر ءِ شفٹ انچارج ءُ کارندہ آناں مبارک بات دات ءُ گیش محنت کنگ ءِ پنت ءُ شون کت۔ تہی کارانی وزیر محسن نقوی ءَ نادرا ءِ چیئرمین لیفٹیننٹ جنرل محمد منیر افسر ءُ آئی ءِ ٹیم ءِ کارکردگی ءَ را ھم ساڑات۔ تر ءُ تاب ءِ ساھت ءَ وزیر داخلہ محسن نقوی ءَ ویٹنگ ایریا ءُ جتا جتائیں کاؤنٹر آنی تر ءُ تاب کتگ ءُ شہری آں گوں گند ءُ نند کتگ ءُ آہانی جیڈھ آنی بابت ءَ جست ءُ پرس کتگ ءُ شہری آنی شناسنامہ ءِ ھوالگ ءَ جیڈھ آناں ترندیں رنگ ءَ گیش ءُ گیوار کنگ ءِ پرمان داتگ۔ وزیر داخلہ محسن نقوی ءَ نوکیں آٹومیٹک مشین ءِ چار ءُ تپاسی ھم کتگ ءُ آٹومیٹک شناختی کارڈ نمبر رجسٹریشن ءُ فنگر پرنٹ ءِ وسیلگ ءَ آٹومیٹک سسٹم ءِ کارروائی ءِ چار ءُ تپاسی کتگ۔ وزیر داخلہ ءَ گوشت کہ من اے مرکز ءِ تر ءُ تاب ءَ چہ وش آں ءُ شہری آناں ودار کنگ نہ لوٹیت۔ نادرا مرکز ءَ بے ودار ءَ کار ءِ ھست بوھگ شر اِنت۔ محسن نقوی ءَ گوشت کہ ھمک پڑ ءَ شہری آنی واستہ آسراتی پیداک کنگ ءِ واستہ گامگیج برجاہ بیت۔
