اسلام آباد۔29جنوری (اے پی پی ) ملک ءِ صدر ڈاکٹر علوی ءَ ملک ءَ یک وڑیں تعلیمی نظام ءِ ضرورت ءِ سرءَ زور پِر داتگءُ گشتگ کہ چاگردءَ یک وڑیں موہ تنا وانگءُ زانگءَ چہ حاصل بنت، تعلیم ءِ پڑءَ زالبول باز محنت کنگ ءَ اَنت ، بے زالبولانی دیمروئی ءَ ملک دیمروئی کت نہ کنت۔ آئیءَ اے گپ سے شمبے ءِ روچءَ ایوان صدر ءَ بنجاہی تعلیمی بورڈ ءِ چیردستی ءَ سالانہ ایوارڈ ءِ مراگشءَ گوں تران کنانءَ کتگ کہ ملک ءَ مردین آدم ءُ جنین آدماں یک وڑیں وانگءُ زانگءِ موہ دیئگ المی اِنت، انگلش ءُ اُ ردو میڈیم نظام تعلیمءَ چاگردءَ دوبھر کتگ۔ صدرءَ گشتگ کہ ملک ءَ یک وڑیں تعلیمی نظام ءِ ضرورت اِنت۔ آئیءَ گشتگ کہ انگلش ، اُردو میڈیم ءُ مدرسہ آنی تہءَ یک وڑیں نصاب بہ بنت۔ صدرءَ گشتگ کہ پاکستانءَ 2کروڑ ءَ چہ گیش زھگ وانگءُ زانگءَ چہ زھبار اَنت۔آئیءَ گشتگ کہ چاگردءَ یک وڑیں موہ تنا وانگءُ زانگءِ وسیلگءَ چہ دست کپ اَنت۔
