پاکستان ءَ ناشرکاری ءِ ھلاپ ءَ جنگ ءَ بے کساس قربانی داتگ، اوگان سرزمین ءَ چہ ناشرکاری ھچ وڑیں جاوراں منّگ نہ بیت، سرکار ءِ گور ءَ خیبر پختونخوا ءَ ایمرجنسی ءِ جار جنگ ءَ ابید دگہ راہ نیست اَت، نائب مزن وزیر اسحاق ڈار

اسلام آباد۔12اکتوبر  (اے پی پی): نائب مزن وزیر ءُ درئی کارانی وزیر محمد اسحاق ڈار ءَ ناشرکاری ءَ را دمگ ءُ دگنیا ءِ ھاتر ءَ مزنیں چیلنج لیکگ ءِ وھد ءَ گوشت کہ اوگان سرزمین ءَ چہ ناشرکاری ھچ وڑیں جاور ھال آنی تہ ءَ منگ نہ بیت، اوگانستان ءِ نیمگ ءَ چہ پاکستان ءِ سر ءَ اُرش بند کنگ بہ بنت، ھر صوبگ ءَ وتی کرد ءَ پیلو کنگی اِنت کہ راج ءَ را رکھینگ بہ بیت۔ معیشت ءُ ناشرکاری ءِ ھلاپ ءَ جنگ، خیبر پختونخوا ءَ ایمرجنسی ءِ ایر کنگ آسانیں پیسلہ نہ بوتگ، سرکار ءَ ایمرجنسی ءِ جار جنگ ءَ ابید دگہ راہ ءُ درے نیست ات، دھرنا ءُ زھرشانی ءِ سبب ءَ معیشت ءَ را سک باز تاوان رستگ، قانون نافذ کنوکیں ادارہ ناشرکاری ءِ ھلاسی ءِ ھاترا شپ ءُ روچ کار کنگ ءَ انت، پاکستان ءَ ناشرکاری ءِ ھلاسی ءِ ھاترا جنگی ادارگ کتگ ناشرکاری ءِ ھلاپ ءَ جنگ ءَ مئے قربانیانی منّ اِتگ ءُ اے آفت ءِ ھلاپ ءَ پاکستان ءِ کمک ءَ اتکگ۔ آئی ءَ اے ھیالانی درشانی دو شمبے ءِ روچ ءَ انسٹی ٹیوٹ آف اسٹریٹجک اسٹڈیز اسلام آباد ءِ نیمگ ءَ برجم داشتگیں میاں اوستمانی کانفرنس ءَ گوں تران کنان ءَ کت۔ اسحاق ڈار ءَ گوشت کہ ناشرکاری دمگ ءُ دگنیا ءِ واستہ مستریں چیلنج اِنت، پاکستان ءَ ناشرکاری ءِ ھلاپ ءَ جنگ ءَ ابدمانیں قربانی آنی کسہ جوڑ کتگ، پاکستان ءَ ناشرکاری ءِ ھلاپ ءَ دلیری، بہادری ءُ زور ءَ گوں ناشرکاری ءِ دیمپانی کتگ، پاکستان ءِ معیشت ءَ را ناشرکاری ءِ ھلاپ ءَ جنگ ءَ سک باز تاوان رستگ، اے جنگ ءَ چہ گیش قربانی داتگ09 جعفر ایکسپریس ءُ بلوچستان ءَ مزدورانی آوار جنگ ءُ شھید کنگ ءِ سبب ءَ دنیا ءَ ناشرکاری ءِ ھلاپ ءَ جنگ ءَ پاکستان ءِ قربانی منگی اِنت۔ نائب مزن وزیر ءُ وزیر ءِ درئی کار ءَ گوشت کہ ناشرکاری ءِ ھلاپ ءَ جنگ ءَ ھمک صوبگ ءَ وتی کرد پیلو کنگی انت۔ مزن وزیر شہباز شریف ءِ سروکی ءَ ناشرکاری ءِ ھلاسی ءِ واستہ نوکیں لیکہ آنی سر ءَ کار کنگ بوتگ، ناشرکاری ءِ ھلاسی ءِ واستہ کانود نافذ کنوکیں ادارگ شپ ءُ روچ کار کنگ ءَ انت، آرمی اسٹاف ءِ سروک ءُ چیف آف ڈیفنس فورسز فیلڈ مارشل سید عاصم منیر ناشرکاری ءِ ھلاسی ءِ واستہ یکزمیگ انت۔ آئی ءَ گوشت کہ سیکورٹی فورسز فیلڈ مارشل سید عاصم منیر ءِ پنت ءُ شون ءِ رد ءَ ناشرکارانی ھلاپ ءَ روچ پہ روچ آپریشن کنگ ءَ انت۔ اسحاق ڈار ءَ گشتگ کہ من ناشرکاری ءِ جیڑہ ءِ سرا گپ ءُ تران کنگ ءِ ھاتر ءَ اوگانستان ءِ ھم تر ءُ تاب کتگ، ءُ مدام اوگانستان ءِ سرکار ءَ گوں زور دیگ ءَ آں کہ آ وتی مٹی ءَ پاکستان ءِ ھلاپ ءَ کارمرد کنگ ءَ بہ رکین ایت۔ پاکستان ءَ چہ اوگانستان ءَ بس یک لوٹے است کہ آ وتی مٹی ءَ پاکستان ءِ ھلاپ ءَ کارمرد کنگ ءَ مہ دنت۔ اگست 2025 ءَ پاکستان، چین ءُ اوگانستان ءِ سئے نیمگی دیوان ھم بوتگ بلے اوگان واکداراں وتی وعدہ پیلو نہ کتگ اَنت۔ اوگانستان ءَ بندش جتگیں ٹی ٹی پی ءُ دگہ ناشرکارانی ھست بوھگ دمگی امن ءِ ھاترا ھترہ اِنت۔ ناشرکار چہ سرحد ءِ آ دگہ نیمگ ءَ نفوذ کن اَنت ءُ مئے سپاھیگ ءُ شھر ءِ سر ءَ اُرش کن اَنت۔ پاکستان ءَ ناشرکارانی روگ ءُ آیگ ءِ گر ءُ دار ءِ واستہ اوگان سیم سر ءَ ایمنی ءِ باڑ جوڑ کتگ ۔ اوگان سرزمین ءَ چہ ناشرکاری ھر وڑ ءَ نا منّگ بیت۔ انسانی ہمدردی ءِ بنیاد ءَ پاکستان ءَ اوگانستان ءِ سک باز کمک کتگ۔ آئی ءَ گوشت کہ اوگان سرزمین ءَ چہ پاکستانی شہری نشانگ جوڑ کنگ بنت، جعفر ایکسپریس ءِ ہائی جیک کنگ ءِ منصوبگ ھم اوگانستان ءَ چہ جوڑ کنگ بوتگ، اوگان طالبان ءِ سرکار ناشرکار آنی ھمک رنگ ءِ کمک ءَ بند بہ کنت ایشانی تہ ءَ سلاہ ھم ھوار انت۔ اوگان سرزمین ءَ چہ پاکستان ءِ سر ءَ اُرش ھم بند کنگ بہ بنت۔ آئی ءَ گوشت کہ پاکستان ءَ ھمزوری ءُ ایمنی ءِ ھمساھگی ءِ اصول ءِ سر ءَ مھکمیں ایمان اِنت، اوگان واکدار ناشرکاری ءِ جیڈھ ءِ سر ءَ وتی وعدہ آنی سر ءَ عمل بہ کن اَنت، اوگان ھاک پاکستان ءَ ھوار ھچ ملک ءِ ھلاپ ءَ کارمرد کنگ مہ بنت، میاں اوستمانی براتی ناشرکاری ءِ آفت ءِ ھلاپ ءَ پاکستان ءَ کمک بہ کن اَنت۔ اسحاق ڈار ءَ گوشت کہ دھرنا ءُ زھرشانی معیشت ءَ را سک باز تاوان دنت، گوست ءَ ھم دھرنا ءَ چہ ملک ءِ معیشت ءَ را تاوان رستگ، دھرنا ءِ سبب ءَ مارا سک باز معاشی تاوان ءِ آماچ بوتگ ۔ آئی ءَ گوشت کہ خیبر پختونخوا ءَ ایمرجنسی ءِ ایر کنگ آسانیں پیسلہ نہ بوتگ، حکومت ءِ گور ءَ ایمرجنسی ءَ ابید دگہ راہ نیست، خیبر پختونخوا ءَ ناشرکاری ءِ ھلاسی ءِ واستہ توامیں وسیلگ آناں کارمرد کنگ بوھگ ءَ انت۔ نائب مزن وزیر ءَ گوشت کہ پاکستان جھان ءِ تک ءَ ناشرکاری ءِ ھلاسی ءِ واستہ جتاجتائیں فورم آنی سر ءَ کار کنگ ءَ انت، مئے کانود نافذ کنوکیں ادارگ آنی گنجائش ءِ تہ ءَ گیشی ءِ واستہ مارا میاں اوستمانی کمک ءِ ھم ضلورت انت۔ اسلام ءِ تہ ءَ انتہا پسندی ءُ ناشرکاری ءِ گنجائش نیست، ھما مردم کہ بے گناھیں مردماں شھید کن اَنت آھاں گوں اسلام ءَ ھچ سیادی نیست، مذھب ءِ آڑ ءَ ناشرکاری ءِ موکل دیگ نہ بیت۔ اسحاق ڈار ءَ گوشت کہ پاکستان جنجال آنی ایمنیں رنگ ءَ گیش ءُ گیوار کنگ ءِ حمایت ءَ کنت، نوں دگنیا پاکستان ءَ را امن دوستیں ملکے ءِ بستار ءَ زانت، دمگ ءَ امن ءِ واستہ پاکستان ءِ کوشست چہ کس ءَ چیر نہ انت، پاکستان ءِ ھلاپ ءَ منفی پروپیگنڈا شنگ کنوک مدامی وڑ ءَ بے سوب مان اَنت۔ پاکستان ءَ ھمک وڑیں ناشرکاری ءُ آئی ءِ گیواری دُگنیا ءِ دیم ءَ پیش کُتگ اَنت ۔ وزیر ءِ درئی کار ءَ مکہ ءِ یکجائی دیمپانی معاہدہ ءِ ذکر کنان ءَ گوشت کہ اے معاہدہ ءِ مستریں مول ءُ مراد خطہ ءَ امن ءِ برجائی انت۔ مکہ ءِ دیمپانی معاہدہ ہچ ملک ءِ ھلاپ نہ انت۔ دنیا ءَ ناشرکاری ءُ جنگاں ہوار بازیں چیلنج دیم ءَ انت ۔ ایشی ءِ بنجاہی کارگس ریاض ءَ جوڑ کنگ بوتگ۔ یکجائی دیمپانی منوگری ءِ رد ءَ کمیٹی ھم جوڑ کنگ بوتگ۔