صدر آصف علی زرداری ءَ ناروے، آذربائیجان ءُ سوئٹزرلینڈ ءِ نامینتگیں سفیراں گوں گند ءُ نند کتگ، اسناد پیش کتگ، دو نیمگی سیادی ءَ را گیش مھکم کنگ ءِ راہ ءُ درانی سر ءَ گپ ءُ تران

اسلام آباد۔12اکتوبر  (اے پی پی): صدر آصف علی زرداری ءَ ایوان صدر ءَ ناروے، آذربائیجان ءُ سوئٹزرلینڈ ءِ نامینتگیں سفیر آناں وتی اسناد پیش کتگ۔ صدر ءِ مملکت ءَ سئیں سفیر آناں گچینکاری ءِ سر ءَ مبارک بات دات ءُ پاکستان ءَ وتی سفارتی ذمہ واری آنی کامیاتیں مدت ءِ واستہ نیکیں واھشت آنی درشان کت۔ ایوان صدر ءِ میڈیٹرینین ونگ ءَ برجم داشتگیں گند ءُ نند ءِ ساھت ءَ صدر ءِ مملکت ءَ دو نیمگی سیادی ءَ را گیش مھکم کنگ ءِ آسراتی آنی سر ءَ ھیال ریچی کت، ھاسیں رنگ ءَ اقتصادی کمک، تجارت ءُ سرمایہ کاری ءُ وت مہ وتی دلچسپی ءِ ایندگر شوبگ آنی سر ءَ تران کت۔ صدر ءِ مملکت ءَ ناروے ءِ نامینتگیں سفیر سگوالڈ ہج ءَ گوں گند ءُ نند ءَ پاکستان ءُ ناروے ءِ نیام ءَ دیریں دوستی ءِ سیادی ءَ را گیش مھکم کنگ ءِ جزم ءِ درشان کت۔ آئی ءَ 2022 ءَ پاکستان ءَ تباہ کنوکیں سیلاب ءِ وھد ءَ ناروے ءِ کمک ءِ توسیپ کت ءُ اپریل 2026 ءَ دوئیں ملک آنی نیام ءَ موسمیاتی کمک ءِ ھوالگ ءَ یک تپاک نامہ ءِ سر ءَ دستخط کنگ ءِ بندات کت۔ آئی ءَ دوئیں ملک آنی نیام ءَ سیادی ءَ را دیمروئی دیگ ءَ پاکستانی ڈائسپورا ءِ کرد ءَ را ھم ساڑات۔ صدر ءِ مملکت ءَ آذربائیجان ءِ نامینتگیں سفیر عرفان شکیروغلو داوت اوگلو ءَ گوں تران کنان ءَ پاکستان ءُ آذربائیجان ءِ نیام ءَ نزیکیں ءُ برات ءِ سیادی ءِ سر ءَ پدا زور پر دات۔ آئی ءَ مھکمیں دو نیمگی سیادی آناں گیشیں تجارت ءُ سرمایہ کاری ءِ تہ ءَ بدل کنگ ءِ ضلورت ءِ سر ءَ زور پر دات۔ صدر مملکت ءَ توانائی، دمگی سیادی ءُ دفاع ءِ شوبگ ءَ کمک ءِ مزنیں گنجائش ءِ سر ءَ زور پر دات ءُ دیمپانی ءُ صنعتی کمک ءِ تہ ءَ پیشرفت ءِ بندات کت۔ آئی ءَ گوشت کہ دوئیں ملک آنی نیام ءَ براہ راست ھوائی رابطہ الس ءَ را مردم ءُ دود ءُ ربیدگی سیادی آناں دیمروئی دیگ ءَ ھاسیں کرد پیلو کنگ ءَ انت۔ سوئٹزرلینڈ ءِ نامینتگیں سفیر اسٹیفن لارنٹ رے ءِ گوما گند ءُ نند ءَ صدر ءَ میانجی داری ءُ امن ءِ کوشست آنی تہ ءَ سوئٹزرلینڈ ءِ کرد ءِ توسیپ کت ایشی ءِ تہ ءَ برگن اسٹاک ءَ امریکہ ءُ ایران ءِ نیام ءَ تکنیکی گپ ءُ تران ءِ آسراتی ھوار اِنت۔ صدر ءِ مملکت ءَ دمگی امن ءِ واستہ برجاھیں کمک ءِ ارزشت ءِ سر ءَ زور پر دات ءُ تجارت، سرمایہ کاری، دوائی، انفارمیشن ٹیکنالوجی، سائبر سیکورٹی، قابل تجدید توانائی، آپ ءِ بندوبست ءُ سیل ءُ سواد ءِ شوبگ آنی تہ ءَ کمک ءِ موہ آنی سر ءَ زور پر دات۔ گند ءُ نند ءَ سینیٹر شیری رحمان، سینیٹر سلیم مانڈوی والا اور سیکریٹری خارجہ عاصم افتخار احمد  ءَ ھم شریک بوتگ انت۔