اسلام آباد۔ 29 جنوری (اے پی پی) ورلڈ وائلڈ لائف فاؤنڈیشن وزیراعظم نا 10 ملین ٹری سونامی ڈٹ اٹی بشخ ہلنگ نا است خواہی نا درشانی ءِ کرسا دا بابت وزارت موسمیاتی بدلی تون زوت مفاہمت نا سمجھوتہ کننگ نا فیصلہ کرینے۔ وزیراعظم نا سلاہکار موسمیاتی بدلی ملک امین اسلم تون ورلڈ وائلڈ لائف فاؤنڈیشن نا صدر احمد بلال و ڈائریکٹر رب نواز سے شنبے نادے آ داڑے اوڑدہی کرے۔ ملک امین اسلم ورلڈ وائلڈ لائف فاؤنڈیشن نا ڈل ءِ وزارت موسمیاتی بدلی نا دہ بلین ٹری سونامی پروجیکٹ، ریچارج پاکستان، جنگلی حیات نا رکھ انا ڈٹ آتون اوار چندی معاملہ غاتا بارواٹ سرجم آتیان معلومدار کرے۔ وزیراعظم نا سلاہکار پارے کہ پاکستان نا کانفرنس آف پارٹیز (کاپ24) اٹی نائب صدر و اقوام متحدہ نا مسٹ میکو سیشن ایشیا پیسیفک فورم اٹی وائس چیئرمین نا وڑاٹ گچین مننگ اسہ سفاءُ بدلی اسے نا بناءِ۔ ملک امین اسلم پارے کہ پاکستان اٹی سیل و سوات، سیر و تفریح نا بے شمار ہند و قدرتی ندارہ غاک ءُ ہرافتے ہُننگ کن ملکی و درملکی سیل وسواتیک بریرہ۔ وزیراعظم عمران خان سیل و سوات ءِ پین ودفنگ کن سیل وسوات اٹی مون تروک ویل آتا پیدواری و اولیتی بنداو تیا چٹفنگ کن کانود اٹی نرمی و سیل و سواتی ہند آتے ٹی شونداری کاریم کننگ کن ٹاسک فورس اس جوڑ کرینے۔ ورلڈ وائلڈ لائف فاؤنڈیشن نا ڈل ملک امین اسلم ءِ معلومدار کرے کہ ورلڈ وائلڈ لائف فاؤنڈیشن وزیراعظم نا دہ بلین ٹری سونامی پروجیکٹ اٹی بشخ ہلنگ نا است خواہ ءِ و دا بابت آن مفاہمتی یات داشت آہم زوت وزارت موسمیاتی بدلی تون دستخط کیک۔ ورلڈ وائلڈ لائف فاؤنڈیشن نا صدر احمد بلال پارے کہ ورلڈ وائلڈ لائف فاؤنڈیشن پاکستان اٹی الس اٹی چاگڑدی رکھ انا شعور، شجرکاری ، سنو لیپرڈ انا رکھ، سموگ اٹی کمتی و پلاسٹک ویسٹ مینجمنٹ کون آ پروجیکٹ آتیا کاریم کننگ ءِ۔
