اسلام آباد۔ 29 جنوری (اے پی پی) بنجائی وزیر ہوابازی و نجکاری محمد میاں سومرو پارینے کہ رکھ، مستعد، پائیدار و اقتصادی وڑاٹ گچین شاری تہوبازی کن جوڑ کروک آ جہانی پالیسی و گائیڈ لین تا پاکستان پبی مخ تفی ءِ کیک، اسہ سوگو ءُ و قابل انحصار چاگڑدی ہن و بر نا نظام (ایئر ٹرانسپورٹ سسٹم ) اس جوڑ کننگ کن پاکستان تینا ایئر نیویگیشن انفراسٹرکچر ءِ پوسکن آ وڑوڈول آتیا ایسونے، کمیونیکیشن ، نیویگیشن و سرویلینس نا پوسکن ءُ سسٹم اس خلنگانے، گوادر انٹرنیشنل ایئر پورٹ نا جوڑ کننگ آن نئے بیرہ ملکی ایئر ٹرانسپورٹ سسٹم سوگو مریک بلکن داڑان ملکی اقتصادی شونداری ٹی ہم ترندی بریک۔ او سے شنبے نادے آ سویلی ایشیا نا ہشت ملک آتا کو آپریٹو پروگرام شاری تہوبازی( سی او ایس سی اے پی۔ایس اے) نا اسٹیرئنگ کمیٹی نا مسہ دے ئی 27 می دیوان نا بنائی سیشن آن تران کریکہ۔ پاکستان نا شاری تہوبازی نا بشخ انا ساڑی آ کارکڑدگی نا بابت بنجائی وزیر پارے کہ ساڑی ہی ٹی بناکروک آ اسلام آباد انٹرنیشنل ایئر پورٹ ملک انا اولیکو گرین فیلڈ ایئر پورٹ ءِ و داکان بیدس ملک انا گیشتر انٹرنیشنل ایئرپورٹ آتے اپ گریڈ کننگانے۔ محمد میاں سومرو پارے کہ سویلی ایشیا ٹی شاری تہوبازی ءِ رکھوک کننگ کن رکھی آب آتیا بایدے عملدرآمد مرے۔ اوپارے کہ شاری تہوبازی ءِ پین رکھوک کننگ کن ہندا کوآپریٹو پروگرام نا باسک ملک آتا نیام اٹ پائیدار، پرامن و تین پہ تین تعلقداری تے ودفنگ اٹ دیوان اسے نا اڈتننگ اہم ءُ کڑد اس ادا کیک۔ داکان مست تینا بیابخیری تران اٹی سیکرٹری ایوی ایشن ڈویژن و ڈائریکٹر جنرل پاکستان سول ایوی ایشن اتھارٹی سکواڈرن لیڈر(ریٹائرڈ) شاہ رخ نصرت پارے کہ شاری تہوبازی نا بشخ اٹی پاکستان پائیدار شونداری نا فلسفہ غا باور کیک۔ اوپارے کہ قومی ایوی ایشن پالیسی نا پوسکن آ گرج آتا رداٹ ہم گرنچی ، ریگولیشن آتے ٹی پوسکن آ واک آتون حکومتی کڑد، شاری تہوبازی نا رکھی معاملہ غاتے ٹی سوگوی، مارکیٹ اسکان رسینگ و ٹریفک نا حق آتے ٹی آزاد پالیسی تے تون اوار اوار ایئر پورٹ آتے پوسکن جوڑ کننگ شاری تہوبازی ٹی پائیدار شونداری کن کروک آ ننا کوشست آتا شاہدی اسے۔ اوپارے کہ سول ایوی ایشن اتھارٹیز بنداوی وڑاٹ تو ریگولیٹرز ءِ ولے شاری تہوبازی نا شونداری و پائیداری کن اودے ہروڑنا آسراتی ہم تروئی مریک۔ اوپارے کہ سٹیرنگ کمیٹی نا دا دیوان بیرہ اسہ دیوان اس اف بلکن باسک ملک آتے رکھوک شاری تہوبازی ءِ المی جوڑ کننگ نا خاطر چاروکی نا کچ ءِ سوگو و عملدرآمد ءِ گچین جوڑ کننگ کن مستقل کوشست کننگ نا عزم انا درشانی ءِ۔ سی او ایس سی اے پی ۔ایس اے نا چیئرمین و مالدیپ نا سول ایوی ایشن اتھارٹی نا سروک حسین جلیل جہانی تہو بازی تنظیم نا کسبی مہارت آتا گرج آتے پورو کننگ و شاری تہوبازی نا رکھوک آب ءِ مون آ دننگ نا بابت کروک آ کوشست آتے مون آ تخا۔ اوداہم پارے کہ ہندا پروگرام سویلی ایشیا ٹی شاری تہوبازی تون گنڈوک افرادی واک ءِ تربیت ترسا پبی کمک کننگ ءِ۔ داوخت آ تران کرسا شاری تہوبازی نا جہانی انجمن نا ایشیاپیسیفک ڈیہہ نا ریجنل ڈائریکٹر ارون مشرا پارے کہ سال 2018 ء ٹی سوا چار ارب نا لگ بھگ مسافر آک چاگڑدی سفر کریر ہرافتا کچ سال 2017 ء نا مقابلہ ٹی 6.1 درسد زیات ئس۔ سی او ایس سی اے پی۔ایس اے نا چیف ٹیکنیکل ایڈوائزر میری ہیلین زبرکی داوخت آ تینا خیال آتا درشانی ءِ کرسا 27می دیون نا غرض و مسخت آتے مون آ تخا و دیوان نا ہر مسٹ آ دے انا ایجنڈا نا سرجم آتے پارے۔
