اسلام آباد۔ 28 جنوری (اے پی پی) وزیراعظم عمران خان پارینے کہ ورناتا تعمیری لائخی تے تالان کننگ و پاکستان اٹی ساڑی ٹیلنٹ ءِ مون آ دننگ کن ورناتے اسپورٹس نا آسراتی تننگ المی ءِ، ملک اٹی اسپورٹس ءِ مون آ دننگ کن جوڑ کروک خصوصی ٹاسک فورس انا کنڈآن پیش کروک آ سلاہ و سوج آتے مون آ تخسا اسپورٹس نا بشخ اٹی المی اصلاحات اتنگ اٹ کمک رسینگک۔ اوداہیت ءِ جاوید آفریدی تون گپ و تران کرسا پارے ہرا دوشنبے نادے آ داڑے اوڑتون اوڑدہی کرے۔ اوڑدہی ٹی جاوید آفریدی وزیراعظم ءِ ’’پشاور زلمے‘‘ نا کنڈآن فٹ بال لیگ انا اڈتننگ نا بابت احوال تس۔ ملک اٹی گوازی تے مون آ دننگ کن گام گیج آتیا ہم گپ و تران کننگا۔ وزیراعظم پارے کہ ورناتا تعمیری لائخی تے تالان کننگ و پاکستان اٹی ساڑی ٹیلنٹ ءِ مون آ دننگ کن المی ءِ کہ ورناتے اسپورٹس نا آسراتی دوبرے۔ اوپارے کہ ملک اٹی اسپورٹس نا مون آ دننگ کن حکومت نا کنڈآن خصوصی ٹاسک فورس اس جوڑ کننگانے، ٹاسک فورس انا کنڈآن پیش کروک آ سلاہ و سوج آتے مون آ تخسا اسپورٹس انا بشخ اٹی المی اصلاحات اتنگ اٹ کمک رسینگک۔ پشاور زلمے نا کنڈآن ملک اسپورٹس نا مون آ دننگ نا چرجوئی ٹی پورو کمک نا باوری ترفنگا۔ وزیراعظم اسپورٹس ءِ مون آ دننگ اٹ پشاور زلمے و جاوید آفریدی نا کوشست آتا ستاءِ کرے۔
