لاہور۔ 28 جنوری (اے پی پی) بنجائی وزیر خزانہ ، ریونیو اینڈ اکنامک افیئرز اسد عمر پارینے کہ این ایف سی ایوارڈ ہر چار آ صوبہ غاتا امنائی اٹ فائنل کننگک۔ آئی ایم ایف تون باقاعدہ ہیت وگپ چلینگ انگ ءِ ، مذاکرات اٹی آئی ایم ایف تینا خواست آتیان شیف بسنے، گیس انا نہاد آتیان پد بجلی نا ٹیرف نا ویل ءِ ہم زوت ایسر کینہ، اوورسیز سرٹیفکیٹ سکیم نا جاری کننگ نا پڑو ءِ وزیراعظم تینٹ کیک، افراط زر نا ساڑی آ کچ پیپلزپارٹی و ن لیگ انا حکومت آتیان بے کچ کم ءِ، الس آ پین بھاریم شاغنگ آن بیدس ریونیو ٹارگٹ ءِ پورو کینہ۔ کاروباری برادری کن کاروبار دوست چاگڑداس ودی کننگ کن کوشست کننگ اُن ، ملک اٹی روزگار نا وارخواہی، جان جوڑی ، تعلیم ، ریونیو نا گچین نظام، امن و ایمنی نا حالیت آتون اوار ایلو ویل آتا ایسری حکومت نا اولیت آتے ٹی اوار ءِ ، بروک آ بنجائی بجٹ اٹی خراج آتے یکجا کرسا نجی بشخ ءِ جم وڑاٹ اسہ خراج اس تننگ و اسہ خراج کلکٹر تون اوار کاریم کننگ نا موقع تننگک۔ او دوشنبے نادے آ لاہور چیمبر آف کامرس اینڈ انڈسٹری ٹی پوریا گر برادری آن تران و میڈیا تون گپ و تران کریکہ۔ داوخت آ وزیر مملکت ریونیو حماد اظہر ، صوبائی وزیر صنعت و واپار میاں اسلم اقبال، چیئرمین ایف بی آر محمد جہانزیب خان، لاہور چیمبر نا صدر الماس حیدر، چیف کلیکٹر کسٹم تون اوار بھلو کچ اسے ٹی پوریا گر برادریک ہم ساڑی ئسر۔ بنجائی وزیر پارے کہ آئی ایم ایف تون باقاعدہ سرجم ہیت وگپ مننگ ءِ، ہیت وگپ آن آئی ایم ایف و حکومت نا نیام اٹ پرخ کم مسنے۔ مذاکرات اٹی آئی ایم ایف تینا پوزیشن ءِ بدلیفینے و او تینا خواست آتیان شیف بسنے۔ نن خوانہ کہ آئی ایم ایف پروگرام زوت آن زوت فائنل مرے۔ این ایف سی ایوارڈ ءِ ہرچار آ صوبہ غاتے ٹی امنائی اٹ طے کننگک، مون نا دیوان اٹی دانا خاکہ ءِ پیش کینہ اوکان پد بنجا و صوبہ غاتے ٹی امنائی ودی کروئی ءِ کہ ہرا ویل آک ءُ ہرافتے اواری اٹ ایسر کروئی ءِ۔ اوپارے کہ ہراتم تحریک انصاف حکومت ءِ سنبھالا تو معاشی وڑاٹ بے یخینی حالیت آتا مون تروک ئس ہراڑکن حکومت بھلو فیصلہ کرے، گیس انا نہاد آتا ویل ءِ ایسر کرے و داسہ بجلی نا ٹیرف نا ویل ءِ ہم زوت ایسر کینہ، انت کہ فیصلہ اس کرینن کوشست ءِ کہ الس آ کم آن کم بھاریم شاغنگے، افراط زر انا کچ پی پی پی و (ن) لیگ انا حکومت آتیان بے کچ کم یعنی 0.4درسد ءِ۔ اوپارے کہ اوور سیز سرٹیفکیٹ مخصوص زر و مد انا مفک دااسکیم ءِ جاری کننگ نا پڑو ءِ 31جنوری آ وزیراعظم تینٹ کیک۔ اوپارے کہ ٹورازم پالیسی آبے تحاشا کاریم مننگ ءِ ملک اٹی ٹورازم نا بشخ اٹی بھلو پوٹینشل اسے، ملائیشیا و ترکی نا ٹورازم آن ارب آ ڈالر کٹیا کننگ اُن، ملک اٹی ٹورازم نا بشخ اٹی بھلو زرمبادلہ اس دوئی کننگ مریک ، اوپارے کہ سادگی اختیار کرسا خڑچ آتے کنٹرول کننگ نا کوشست کننگ اُن، اوپارے کہ آئی ٹی سیکٹر کنا است آن بھاز خڑک ءِ، داڑکن ٹاسک فورس اسے نا جوڑ کننگ ءِ عمل اٹ اتنگانے۔ زوت آئی ٹی انڈسٹری کن پیکج نا پڑو ءِ کینہ، اوپارے کہ ٹریڈ پالیسی آ وزارت واپار کاریم کننگ ءِ، ادارہ غاتا پرائیویٹا ئزیشن آ کاریم مفننگ ءِ، ننے دا ہیت انا تعین ءِ کروئی ءِ کہ ہراادارہ غاتا پرائیویٹا ئزیشن مرے یا اوفتے درست سمت آ ہمہ اتنگ مریک۔ پرائیویٹا ئزیشن نا عمل اٹ 11 بندغ نا اسہ بورڈ اس جوڑ کننگک ہرانا باسک آک 8 پرائیویٹ سیکٹر آن و مسہ حکومت آن مریرہ، اوپارے کہ واپار اٹی آسانی و پیدواری خڑچ اٹی کمتی اتنگ کن کوشست کننگ اُن، بنجائی وزیر پارے کہ 5 فروری آ مروک آ دیوان اٹی بورڈ آف انویسٹمنٹ آن ملکی و جہانی زرکاری نا بابت سرجم آتے بٹنگانن، ساڑی آ انڈسٹریل زون ہرافتا بنداوی گرج آتے پورو مفننگ ءُ اوفتیا کاریم کننگ نا گرج ءِ۔ داکان مست کاروباری ایسوسی ایشن تا سرکڑدہ غاک بنجائی وزیر خزانہءِ تینا ویل آتیان معلومدار کریر و سلاہ و سوج پیش کریر۔ داوخت آ لاہور چیمبر نا صدر تون اوار ایلوفک ہم تینا خیال آتا درشانیءِ کریر۔
