اسلام آباد۔ 28 جنوری (اے پی پی) وزیراعظم نا خصوصی کمکار سمندر پار پاکستانیز سید ذوالفقار عباس بخاری دبئی ٹی آمرن لیبر کیمپ انا دورہ ءِ کرے، خصوصی کمکار نا دبئی ٹی لیبر کیمپ انا دا ارٹ میکو دورہ ءِ۔ خصوصی کمکار نا بننگ آن مزور آتے ٹی خوش اس تالان مس۔ خصوصی کمکار لیبر کیمپ آ ہنا و پاکستانی مزور آتیان اوفتا حالیت نا بارواٹ ہریفے، اوفتا ویل و کمامدارآتا رویہ غاتیا سرجم معلومداری ہلک ۔ دورہ ٹی ذوالفقار عباس بخاری پاکستانی مزور آتے تروک آ آسراتی تا ہم جاچ ءِ ہلک۔ دورہ ٹی خصوصی کمکار ذوالفقار عباس بخاری پارے کہ مزور آک ننا ملک انا میرات آک ءُ ، اینو اوفتا دروشم ءِ ملوک خناٹ کنا است بھاز خوش مس ، اوفتا تکلیف ننا تکلیف ءِ۔ حکومت پیشن نا ملک آتے ٹی رہینگوک آپاکستانی تے میرات پارینے۔ ہنداخاطران ہر ملک آ ہنسا تینا اہل وطن آتے کن انتس کہ مننگ کرے او کیرہ۔ اوپارے کہ کانودی وڑاٹ پیسہ گدریفنگ نا بارواٹ اسہ مہم اس چلیفنگ اُن ، ہرابندغ ءِ پیشن رہینگک اونا پاکستان اٹی بدلی اتنگ اٹ کڑد اس مریک۔ لیبر کیمپ اٹی نیشنل بینک آف پاکستان نا کنڈآن میوزیکل نائٹ نا بست و بند کننگاسس داٹی کانودی وڑاٹ پیسہ غاتے پاکستان آ گدریفنگ نا بابت معلومداری تننگا۔ خصوصی کمکار ایسر اٹ نیشنل بینک انا کنڈآن مزور آتے ٹی ٹیکی ہم بشخ وپانٹ کرے۔
