کوئٹہ۔ 25جنوری (اے پی پی) صوبائی وزیر آبپاشی نوابزادہ طارق مگسی پارینے کہ بلوچستان نا نیمہ آبادی نا گزر بسرکشت و کشار و لائیو اسٹاک آٹی ءِ و اگہ کشت وکشار کن دیر دوئی مفک تو اونا براہ راست زہم معیشت آ مریک ۔ دا سیگن حالیت آتون مون تننگ کن ننے مچ آ صوبہ ٹی ڈیم تا نیٹ ورک اس تالان کروئی مریک ۔ تانکہ دیر انا بھلا تنکی آن بچنگ مرے ۔ دا خیال آتادرشانی ءِ او صوبائی سلاہکار لائیو سٹاک مٹھا خان کاکڑ و مسکوہی صوبائی وزیر میر طارق کھیتران تون گپ و تران کرسا کرے ، او جمعہ نا دے آسول سیکرٹریٹ کوئٹہ ٹی اوڑتون جتا جتا اوڑدہی کریر دا وخت آ سیکرٹری آبپاشی سیلم اعوان ہم ساڑی ئس ۔ نوابزادہ طارق مگسی پارے کہ بلوچستان اٹی ڈیم تا سخت گرج ءِ و محکمہ آبپاشی دا رداٹ جامع حکمت عملی اسے نا رداٹ گچین گام گیج چست کننگ کن غٹ وسیلہ غاتے کاریم اٹ اتنگ انگ ءِ ۔ صوبائی وزیرمستی پارے کہ ننے جلابی دیر ءِ کوڑی کننگ کن چیک و بھلوڈیم جوڑ کروئی مریک ہراڑان ڈغار نا کیرغ آن دیر انا کوڑی تے ٹی ودکی مریک ۔ داکان بیدس ملوک آ دیر انا گچین وڑاٹ کاریم اٹ اتنگ ءِ المی جوڑ کروئی مریک ۔ نوابزادہ طارق مگسی پارے کہ ڈیمز و بلوچستان نا نہری نظام نا گچینی و گیشتری کن بنجان نا کمک المی ءِ ۔ دا رداٹ داسہ بنجائی حکومت آن فنڈز آتا فراوانی کن رابطہ کننگک۔ صوبائی وزیر پارے کہ پرتا کمتی آن ڈغاراٹی دیر انا کچ ترندی اٹ شیف تمنگ ءِ دا حالیت آتیا محکمہ آبپاشی قابل عمل سلاہ وسوج آتا تیاری و زیر تعمیر ڈیم تا دمدستی پوروی ءِ المی جوڑ کننگ کن گچین گام گیج چست کننگءِ ۔
