تحصیل کوئٹہ نا نقشہ نا رداٹ روڈ حکومت بلوچستان نا ملکیت ءِ ، روڈ انا ودفنگ کن دوکان و ہند آتے بِٹنگ آن مست زہمی تے ساڑی آ مارکیٹ ریٹ انا رداٹ معاوضہ تننگ ءِ المی جوڑ کننگے تانکہ خلقت مالی نسخان آن بچنگ کیر، بلوچستان نیشنل پارٹی نا راہشون و باسک بلوچستان اسمبلی احمد نواز بلوچ
کوئٹہ۔ 25جنوری (اے پی پی) بلوچستان نیشنل پارٹی نا راہشون و باسک بلوچستان اسمبلی احمد نواز بلوچ و ملک صلاح الدین شاہوانی نا سرکڑدہ ہی ٹی اسہ ڈل اس تدوک آدے ڈپٹی کمشنر کوئٹہ کیپٹن (ر) طاہر ظفر عباسی تون اوڑدہی کریر۔ ڈل سبزل روڈ کوئٹہ نا زہمی تا گڑتی تا بابت ڈپٹی کمشنر ءِ معلومدار کریر۔ باسک صوبائی اسمبلی احمد نواز بلوچ پارے کہ تحصیل کوئٹہ نا نقشہ نا رداٹ روڈ حکومت بلوچستان نا ملکیت ءِ وخت اس کہ روڈ انا پیشن غٹ تر میرات آک ہندی خلقت نا جند انا ملکیت آک ءُ روڈ انا ودفنگ نا سوب آن علاقہ ٹی رہینگوک آتے مالی نسخان ہرفنگ نا گڑتی ءِ ہراٹی اُراک و دوکان آک اوار ءُ۔ اوپارے کہ ننا خواست ءِ کہ روڈ انا ودفنگ کن دوکان و ہند آتے بِٹنگ آن مست زہمی تے ساڑی آ مارکیٹ ریٹ انا رداٹ معاوضہ تننگ ءِ المی جوڑ کننگے تانکہ خلقت مالی نسخان آن بچنگ کیر۔ اوپارے کہ ضلعی انتظامیہ و حکومت زہمی تا گڑتی تے مر کننگ کن دمدستی گام گیج کے۔ باسک اسمبلی احمد نواز بلوچ پارے کہ او دا چرجوئی ٹی صوبائی حکومت ، چیف سیکرٹری ، سینئر باسک بورڈ آف ریونیو و کمشنر کوئٹہ تون ہم اوڑدہی کرسا اوفتے علاقہ ٹی رہینگوک آتا گڑتی و اوفتے معاوضہ تننگ نا بابت آن معلومدار کیر۔
