اسلام آباد۔ 25جنوری (اے پی پی) تحریک انصاف نا راہشون سینیٹر فیصل جاوید پارینے کہ جان جوڑی نا خرابی نواز شریف نا مرے یا پین راہشون اسے نا ، ہڑتوم آ کنڈآن داڑآ سیاست بایدے کننگپ، پاکستان کشمیر نا ویل انا ایسری کن بھارت ءِ وار وار مذاکرات نا سلہ خلنگ ءِ۔ جمعہ نادے آ پارلیمنٹ ہاؤس نا پیشن میڈیا تون گپ و تران کرسا اوپارے کہ جان جوڑی نا خرابی نواز شریف نا مرے یا پین راہشون اسے نا ، ہڑتوم آ کنڈآن داڑا بایدے سیاست کننگپ۔ اوپارے کہ حکومت ملک اٹی نیزگاری نا چٹفنگ کن پالیسی جوڑ کننگ ءِ، عمران خان نا سیاست اٹی بننگ نا مسخت ملک آن نیزگاری ءِ چٹفنگ نا ءِ۔ دا بابت اپوزیشن ہم حکومت تون تفے۔ سینیٹر فیصل جاوید پارے کہ جوان ءُ حکومت اسے کن جوان ءُ اپوزیشن اسے نا مننگ ہم المی ءِ۔اپوزیشن تینا ویل آ اختہ ءِ ، اودے الس نا فکر اف۔ او تینا جندی ویل آتا ایسری کن کوشست کننگ ءِ۔ اسہ سوج اسے نا ورندی ٹی اوپارے کہ پاکستان و بھارت نا نیام اٹ کشمیر نا ویل انا ایسری نا اسٹ انگا کسر مذاکرات ءِ۔ مچ آ دنیا ءِ سماءِ کہ پاکستان امن کن تینا کوشست ءِ کننگ ءِ و او امن نا سفیر ءِ۔ بھارت اٹی گچین کاریک مننگ والا ءُ۔ مودی پاکستان مخالف بیان بازی کرسا گچین کاری تے ٹی سرسہبی کن کوشست کننگ ءِ۔
