کوئٹہ۔ 24جنوری (اے پی پی) ڈی آئی جی مکران ریجن گوادر شہاب عظیم لہڑی پارینے کہ ٹریفک کانود آ عمل کرسا شکست و جانی نسخان تیان بچنگ مریک ، ٹریفک شکست آتیان بچنگ کن ننے غٹ آ لازم ءِ کہ زموارانہ ڈرائیونگ کین۔ داخیال آتا درشانی ءِ او نیشنل ہائی ویز اینڈ موٹروے پولیس ویسٹ زون سیکٹر 10 گوادر نا کنڈآن تربت یونیورسٹی گواد ر کیمپس اٹی روڈ سیفٹی و ٹریفک کانود نا بابت سیمینار آن تران کرسا کرے ، سیمینار آن موٹروے پولیس گوادر نا سیکٹر 10 انا کمانڈر راؤ حسنات و تربت یونیورسٹی گوادر کیمپس نا ڈائریکٹر اعجاز احمد بلو چ و ایلوفک تران کرسا پاریر کہ مچ آ ملک اٹی پنجا درسد آبادی ورناتیا تالان ءِ ہرا زیات تر ٹریفک کانود نا خلاف ورزی نا مرتکب مریرہ سیمینار اٹی پاننگانے کہ ٹریفک اٹی موبائل فون ءِ ہرگز کاریم اٹ اتپبوہرا جاگہ نا جاگہ سے آ جان ہلوک ثابت مریک وخت اس کہ موٹرسائیکل سوار آتے کن بے کچ المی ءِ کہ ہیلمٹ ءِ کاریم اٹ اتیر و داہیت انا خاص خیال ءِ کیر کہ بیرہ منظور مروک سیفٹی ہیلمٹءِ کاریم اٹ اتیر انتئے کہ ہیلمٹ نمے تمنگ نا حالیت اٹ کاٹم اٹ لگوک آ خطرناک ٹھپ آتیان بچفک ، سیمینار اٹی پاننگانے کہ رکھوک سفر کن ٹائر بنداوی ءُ حیثیت اس تخک اودے ضرور چیک کبو رفتار نا خاص خیال ءِ کبو و رفتار کن روڈ آ نصب سائن بورڈ وہائی وے و موٹروے کوڈ آ عمل کبو لیٹ آک تہاری ٹی زند انا نشانی ءُ شام اٹی سفر کننگ آن مست اوفتے چیک کبو کہ نما گاڈی نا ہیڈ لائٹس و اشارہ غاک جوان وڑاٹ صاف و روشن و درست حالیت اٹ کاریم کننگ ءُ ، ڈرائیونگ کننگ نا وخت آ سیٹ بلٹ ءِ تفبو انتئے کہ پٹ وپول اٹ ثابت مسنے کہ دا نمے ہر شکست نا حالیت اٹ ہفتاد 70 درسد اسکان رکھ فراوان کیک ہندا وڑ موٹرسائیکل ءِ چلیفوک آ بندغ آک ہیلمٹ نا کاریم اٹ اتنگ ءِ المی جوڑ کیر ہراڑان اوفتا زند رکھوک مننگ کیک سیمینار آن ترانکار آک پارینو کہ روڈ سیفٹی و ٹریفک کانود نا شرف بے کچ المی ءِ داڑآ عملدرآمد ءِ ہرحال اٹ المی جوڑ کننگے وخت اس کہ پند اٹ ہنوک آ و روڈ آن ایپار مروک آ بندغ آک مدام فٹ پاتھ اٹ کار اگہ فٹ پاتھ مفئے تو ہمیشہ روڈ انا راستیکو کنڈآن کار تانکہ نم مون نا ٹریفک ءِ خننگ کیرے و اوورلوڈنگ ایلو گاڈی تا رکھوک سفر اٹی اڑاند جوڑ مریک ہنداخاطران اجتناب کروئی مرے سیمینار نا ایسر اٹ روڈ سیفٹی نا یونیورسٹی گوادر کیمپس نا طالب علم آتے ٹی ہیلمٹ بشخ وپانٹ کننگا۔
