اسلام آباد۔ 24جنوری (اے پی پی) بنجائی وزیر ڈٹ بندی ، شونداری و اصلاحات و شماریات ڈویژن مخدوم خسرو بختیار پارینے کہ سپیس ٹیکنالوجی و سائنسز نا گچین کاریم اٹ اتنگ ملکی راجی و اقتصادی شونداری ٹی اہم ءُ کڑد اس ادا کننگ کیک، جیو اسپیشل ٹیکنالوجیز و سٹیلائٹ امیجری نا کاریم اٹ اتنگ آن شونداری ڈٹ آتا جوان وڑاٹ چاروکی و نقشہ سازی ءِ کننگ مریک ہرا ڈٹ آتے ٹی شفافیت ءِ المی جوڑ کننگ آن بیدس گچین ڈٹ بندی و عملدرآمد اٹی ہم کمک فراوان کیک۔ داخیال آتا درشانی ءِ او پنچ شنبے نادے آ اسلام آباد اٹی راجی و اقتصادی شونداری کن پاکستان ریموٹ سینسنگ سٹیلائٹ (پی آر ایس ایس۔۱) نا حساب وکتاب نا کاریم اٹ اتنگ آ اسہ سلابتی سیمینار اسے آن تران کرسا کرے۔ سیمینار نا بست وبند ءِ سپارکو پلاننگ کمیشن آف پاکستان نا اواری اٹ کریسس ہراٹی چندی وزارت و محکمہ غاتا سیکرٹریز و نمائندہ غاک بشخ ہلکر۔ داوخت آ چیئرمین سپارکو کمیشن نا بارواٹی اسہ سرجم ءُ احوال اس تس۔ بنجائی وزیر پارے کہ سپیس ٹیکنالوجی و ایپلیکیشنز نا کاریم اٹ اتنگ آن گورننس و کارکڑدگی ءِ گچین جوڑ کننگ مریک و خڑچ آتے ٹی کمتی اتنگ مریک۔ اوپارے کہ انفارمیشن و کمیونیکیشن ٹیکنالوجیز و تازہ سٹیلائٹ امیجری نا کاریم اٹ اتنگ آن گورننس ءِ گچین جوڑ کننگ تون اوار اوار شاری تے اوفتا درگہ غا المی خذمت تننگ اٹ کمک ملنگ کیک۔ خسرو بختیار پارے کہ سٹیلائٹ ٹیکنالوجی فصل آتا سائز، دیر انا ہن و بر، معدنیات آتے کشنگ و ایلو قدرتی وسیلہ غاتے کن بایدے کاریم اٹ اتنگے، داکان بیدس جنگلات و انفراسٹرکچر ڈٹ آتا گچین مینجمنٹ ہم کننگ مریک ہراڑان راجی و معاشی فائدہ دوئی مریک۔ اوپارے کہ داوڑوڈول آتے جہانی کہول آ ہم تینا کننگانے و بھاز انگا ملک آک دا ٹیکنالوجی تا کاریم اٹ اتنگ آن فائدہ ہرفنگ ءُ۔ بنجائی وزیر پارے کہ ساڑی حکومت نا اولیت غٹ شونداری ڈٹ آتا بروخت پورو کننگ نا ءِ۔ وزارت ڈٹ بندی دا چرجوئی ٹی چندی شونداری ڈٹ آتا گچین چاروکی و گچین فیصلہ سازی کن اسہ پائلٹ ڈٹ اس بناکیک۔ پوسکن آ جیو اسپیشل ٹیکنالوجی دُن کہ سٹیلائٹ نا عکس، جغرافیائی معلومداری نا نظام و ریموٹ سینسنگ سیٹلائٹ نا کمک اٹ برجا شونداری ڈٹ آتا بروخت پوروی تون اوار اوار شفافیت ءِ مون آ دننگ اٹ ہم کمک رسینگک۔ بنجائی وزیر مخدوم خسرو بختیار ملک اٹی راجی و اقتصادی شونداری نا مسخت آتا دوئی کننگ کن نیشنل سپیس ایجنسی سپارکو نا کاریم نا ستاءِ کرے و اومیت ظاہرکرے کہ کمیشن پوسکن آ ٹیکنالوجی ءِ درستی راستی کرفنگ و اونا مون آ دننگ کن تینا کاریم ءِ برجاتخک ہراڑان الس نا گچینی تون اوار اوار معیشت نا شونداری ٹی ہم کمک رسینگک۔
