اسلام آباد۔ 24جنوری (اے پی پی) چیئرمین سینیٹ محمد صادق سنجرانی پارینے کہ میڈیا راج انا اہم ءُ بشخ اسے و صحافی ملکی ویل آتے تالان کننگ تون اوار اوار راجی و قومی شونداری کن راہشون اصول مرتب کننگ اٹ مدام کمک کیرہ، ولے بد بختی اٹ ہمو تپہ ہرا راج انا ہر بشخ انا ویل آتے تالان کیک اونا تینا ویل آتے گوجالنگک، اوپارے کہ صحافی تا ملازمت آتا رکھ اکن مست آن ساڑی کانود آ بایدے عملدرآمد مرے و گرج مس تو دا چرجوئی ٹی پوسکن ءُ کانود اس ہم جوڑ کننگ مریک۔ سینیٹ سیکرٹریٹ نا رداٹ اوداخیال آتا درشانی ءِ پشاور پریس کلب نا اسہ ڈل اسے تون گپ و تران کرسا کرے ہرا اینو اوڑتون پارلیمنٹ ہاؤس اٹی اوڑدہی کریر۔ داوخت آ سینیٹر خانزادہ خان ہم ساڑی ئس۔ چیئرمین سینیٹ محمد صادق سنجرانی پارے کہ پشاور و خیبر پختونخوا نا ایلو علاقہ غاتے ٹی کاریم کروک آ صحافیک دہشت گردی نا برخلاف جنگ اٹی بے پناہ قربانی تسنو و علاقہ ٹی امن نا بحالی کن نمان کڑد ادا کرینو ۔ اوپارے کہ داقربانی تے گوجالنگ انگ مفک۔ اوپارے کہ ایوان بالا دا چرجوئی ٹی فعال ءُ کڑد اس ادا کیک و ڈل انا کنڈآن تالان کروک آ صحافی تے مون تروک ویل آتا بابت تعلقدار بشخ آتون گپ و تران کننگک تانکہ دا ویل آتا قابل عمل ایسر اس کشنگ مرے۔ اوپارے کہ صحافی تا ملازمت آتا رکھ اکن مست آن ساڑی کانود آ عملدرآمد ءِ المی بایدے جوڑ کننگے۔ داکان مست پشاور پریس کلب نا نمائندہ غاک چیئرمین سینیٹ ءِ صحافی برادری ءِ مون تروک ویل آتا بابت معلومدار کریر۔ اوپاریر کہ ٹی وی چینلز و میڈیا نا ادارہ غاتا کنڈآن صحافی تے بیدس نوٹس آن نوکری تیان کشنگ انگ ءِ و چیئرمین آن خواست کریر کہ او دامعاملہ نا ایسری کن تینا کڑد ءِ ادا کے و تعلقدار بشخ آتون دابابت ہیت کے۔
