اسلام آباد۔ 24جنوری (اے پی پی) وزیر خارجہ شاہ محمود قریشی پارینے کہ ترندی اٹ رونما مروک آ جہانی بدلی تے ٹی ننے بھاز انگا چیلنج آک مون تروک ءُ، ننا سفارت کار آتے دا چیلنج آتا مقابلہ ءِ کروئی مریک۔ ننے معاشی سفارت کاری و سفارت کاری نا پوسکن آ جہد آتیا ہم پبی چکار کروئی مریک۔ پنچ شنبے نادے آ فارن سروسز اکیڈمی ٹی سی ءُ ہشت می سپیشلائزڈ ڈپلومیٹک ٹریننگ کورس اٹی اوار آفیسر آتا گریجویشن دود آن تران کرسا وزیر خارجہ پارے کہ ترندی اٹ رونما مروک آ جہانی بدلی تے ٹی پاکستان کن ہراڑے بھاز انگا وارخواہیک اریر ہموڑے ننے بھاز انگا چیلنج آتا ہم مون تروک ءِ ۔ ننا سفارت کار آتے دا چیلنج آتا مقابلہ ءِ کروئی ءِ۔ دود اٹی سیکرٹری خارجہ تہمینہ جنجوعہ ، مسکوہی ڈی جی اکیڈمی ، ریٹائرڈ سینئر سفارتکار ، اسلام آباد نا موقر تعلیمی ادارہ غاتا نمائندہ غاک و تربیت پورو کروک آ آفیسر آتا خاہوت آک بشخ ہلکر۔ وزیر خارجہ سرسہبی اٹ تربیت ءِ پورو کروک آ آفیسر آتے مبارکباد پیش کرے و اوفتے فارن سروس آف پاکستان نا بشخ مننگ آ بخیر اٹ پارے۔ اوپارے کہ ننا سفارت کار آتے ڈیہہ ٹی و جہانی کہول آ ساڑی واپاری اقتصادی وارخواہی تے گچین سفارت کاری اٹ کاریم اٹ اتوئی ءِ۔ کنے تینا سفارت کار آتالائخی تیا پبی پت ءِ کہ او تینا گچین لائخی تے اٹ مچ آ دنیا ٹی پاکستان نا گچین نمائندگی ءِ کیرہ۔ وزیر خارجہ پارے کہ کنے پورو باور ءِ کہ ننا ڈپلومیٹس پورو تندہی اٹ ملک و قوم نا خذمت ءِ کیک۔ نن فارن سروس اکیڈمی ءِ تکنیکی آسراتی و تربیت نا لحاظ اٹ پین گچین جوڑ کننگ کن کوشست کننگ اُن۔ وزیر خارجہ پارے کہ پاکستان گچین سفار ت کار ودی کرے ولے اینو ننے بھاز انگا چیلنج آک مون تروک ءُ ہرافتیان ننے تینے کشوئی ءِ۔ ننے معاشی سفارت کاری و سفارت کاری نا پوسکن آ جہد آتیاہم پبی چکار کروئی مریک۔ وزیر خارجہ مخدوم شاہ محمود قریشی تربیت اٹی گچین کارکڑد نشان تروک آ آفیسر آتے ٹی شیلڈ و سرٹیفکیٹس بشخ وپانٹ و اکیڈمی نا وزیٹر زبک اٹی تاثرآتے ہم نوشتہ کرے۔
