اسلام آباد۔ 24جنوری (اے پی پی) وزیر مملکت داخلہ شہریار آفریدی پارینے کہ اسلام آباد و پاکستان ءِ منشیات آن پاک کننگک، ہائبرڈ ففتھ جنریشن وار انا کمک اٹ ورناچین ءِ تباہ کننگ انگ ءِ، پاکستانی قوم لازوال قربانی ترسا تینا رکھ ءِ کرینو، سوگو و متکن آ خاہوتی نظام اٹ چناتا جوان تربیت مسکہ، زند انا رُمب اٹی لمہ و باوہ غاک چناتے گوجالار، ننے تینا راجی اقدار ءِ بحال کروئی مریک۔ پنچ شنبے نادے آ ہلال احمر پاکستان اٹی اسلام آباد نا ضلعی انتظامیہ ناکنڈآن ’’منشیات آن پاک اسلام آباد‘‘ نا سرحال آ سیمینار آن تران کرسا اوپارے کہ لمہ و باوہ اینو تینا چناتا بابت دااضطراب اٹی مبتلا ءُ ننا راجی ڈھانچہ بدل مسنے۔ اسہ ایلو کن احساس و دڑد مست آنبار سلتنے ، زند انا رُمب و است خواہی تا پوروی ٹی نن ہنداخہ مون آ ہنانن کہ تینا انفرادی و اجتماعی زمواری تے گیرام کرینن۔ مہالو اگہ اُراسے ٹی مرک اس مسکہ تو کیہی کیہی دے اسکان مرمر اسکان ماتن مسکہ، اسہ ایلو کن است اٹی دڑد و تکلیف ئس، داسہ راج اٹی مست آنبار جوزہ پین سلتنے۔ اوپارے کہ زند انا رُمب اٹی لمہ وباوہ چناتے گوجالانوو چناتے استاد و ملازم آتا دوٹی تسنو۔ مہالو چناک تینا لمہ و باوہ و اسیجا خاہوتی نظام نا سیخا ٹی رہینگارہ، چناتے منشیات آ خلکر و ولدا اوفتے بلیک میل کننگک، لمہ و باوہ چناتے موبائل فون ، ٹیبلٹ و لیپ ٹاپ تفس و اوفتا سرجزآتیا نظر تخر۔ہلال احمر پاکستان نا ڈاکٹر سعید الٰہی پارے کہ ننتون مچ آ ملک اٹی رضاکار آتا نیٹ ورک اس ارے و منشیات نا برخلاف جہد اٹی نن حکومت تون ہم کوپہ کاریم کینہ۔ چیف کمشنر اسلام آباد عامر احمد علی پارے کہ وزیراعظم اسلام آباد ءِ خاص کر منشیات آن پاک کننگ نا پارت کرینے ہراڑا عمل کننگ کن سرگرمی اٹ کاریم کننگ انگ ءِ۔ اوپارے کہ بیرہ انفورسمنٹ آن ویل ایسر مفک بلکن راج اٹی شعور و آگاہی ودی کننگ نا گرج ءِ ۔ اوپارے کہ داسہ پوسکن ءُ وڑاسے نا منشیات ءِ کاریم اٹ اتنگ انگ ءِ۔ داسہ منشیات ءِ تفریح مسخت آتے کن ہم کاریم اٹ اتنگ انگ ءِ۔ داڑکن کانود ءِ سخت جوڑ کننگ و سزاتے ودفنگ نا گرج ءِ۔ منشیات نا توننگ کن استاد و لمہ و باوہ غاتون اوار اوار عالم دین تیا ہم بھلو زمواری اس مریک۔ فورس کمانڈر نارتھ اے این ایف بریگیڈیئر مبشر پارے کہ منشیات نا برخلاف کارروائی و گام گیج آتون اوار اوار اونا کاریم اٹ اتنگ اٹ ودکی مسنے۔ تعلیمی ادارہ غاتے ٹی منشیات نا توننگ کن گام گیج آتا گرج ءِ۔ بیرہ سیمینار و لیکچرز آتیان دا ویل ایسر مفک ، استاد آتے تربیت تننگ نا گرج ءِ۔
