صدر مملکت ڈاکٹر عارف علوی نا 11می انٹرنیشنل کارپوریٹ راجی زمواری سمٹ، ایوارڈ 2019ء نا دود آن تران

اسلام آباد۔ 24جنوری (اے پی پی) صدر مملکت ڈاکٹر عارف علوی پارینے کہ اسہ ہم راج اس السی شرحالی نا نظام آن بیدس شون ہلنگ کپک، ساڑی حکومت نا وژن پاکستان ءِ شرحالی ءُ ریاست اس جوڑ کننگ نا ءِ وخت اس کہ الس نا شرحالی نا زمواری کارپوریٹ سیکٹر آہم مریک۔ اوداہیت ءِ پنچ شنبے نادے آ داڑے 11می انٹرنیشنل کارپوریٹ راجی زمواری سمٹ و ایوارڈ 2019ء نا دود آن تران کرسا پارے۔ صدر پارے کہ اسلام اسہ پورو ءُ دین اس و ضابطہ حیات ءِ۔ نبی کریم ﷺ انسانی حق آتا بابت خصوصی وڑاٹ تاکید کرے،اسلام اٹی انسانی حق و انسانی فلاح تون اوار راجی خذمت آ بھاز زور شاغنگانے ، صدقہ و خیرات و زکواۃ ادا کننگ نا تاکید کننگا۔ اوپارے کہ دنیا ٹی 26بندغ مچ آ دنیا نا مسہ نیم ارب خلقت آن زیات امیر ءُ و اوفتا دولت نا گڑاس بشخ دنیا نا نیزگاری ءِ چٹفنگ کن بس ءُ۔ صدر پارے کہ پاکستان نا خلقت صدقہ و خیرات تننگ اٹ ہردم مون اٹ سلرہ ، دارداٹ او2005ء نا زمی جمب اٹی زہمی تا است انا حب اٹ کمک کننگ نا مثال اس پیش کریر۔ صدر پاکستان اٹی اوغان باہوٹ آتا ذکر ءِ کرسا پارے کہ نن اوغان مہاجر آتے بخیر اٹ پارین و اوفتا است انا حب اٹ مہمان نوازی ءِ کرین وخت اس کہ ایلو کنڈ یورپی ملک آک منہ سدباہوٹ آتا میزبانی ٹی لیت و لعل آن کاریم ہلسا کرینو۔ صدر بحیرہ روم اٹی اسہ مسہ سالہ شامی چناسے نا مرک انا ہم حوالہ ءِ تس ہرانا خاہوت یورپ آ ہِننگ نا کوشست کریکہ۔ صدر مملکت پارے کہ ہچ ءُ راج اس السی شرحالی نا نظام آن بیدس شون ہلنگ کپک تعلیم و جان جوڑی قومی شونداری نا بابت بے کچ اہم ءِ۔ اوپارے کہ چین جان جوڑی و تعلیم آ چکار کرسا کروڑ آ خلقت ءِ غریبی آن کشا، پاکستان ءِ ہم بایدے ہنداوڑ کروئی مرے و او داوڑ کیک، صدر پارے کہ الس نا شرحالی نا زمواری کارپوریٹ سیکٹر آ ہم مریک۔ ریاست آتے متمول تپہ غاتیا خراج بایدے خلوئی مرے تانکہ کم کٹیا کروک آ تپہ غاتا رکھ و اوفتے اسہ وڑ وارخواہی فراوان مرے۔ اوکارپوریٹ سیکٹر آ زور شاغا کہ او تعلیم و جان جوڑی نا آسراتی تا فراوانی نا کمک اٹ تھر انا علاقہ نا رہینگوک آتے کن ڈٹ آتا بناءِ کے وخت اس کہ راجی شرحالی خذمت آتے ٹی ایلو خلقت نا است بڈی ءِ ہم بایدے کروئی مرے۔ اوپارے کہ پاکستان اٹی بے پناہ لائخی و وسیلہ ارے ہرافتیان پبی فائدہ ہرفنگ نا گرج ءِ ۔ صدر پارے کہ احساس زمواری مفئے تو راج بشخ وپانٹ مریک۔ صدر کارپوریٹ راجی زمواری نا رداٹ نمان خذمت کروک آ کارپوریٹ ادارہ غاتے ٹی ایوارڈ ہم بشخ وپانٹ کرے۔