اسلام آباد ۔ 23 جنوری (اے پی پی) مزن وزیر عمران خان ءَ پی ٹی وی ءَ را یک ارزشتی ایں ادارگ ءِ نامینان ءَ پنت ءُُُ شون کت کہ پی ٹی وی ملکی پجار، راجی مڈی ءُُ پاکستانیت ءَ را سہرا کنگ ءِ واستہ ھاسیں دلگوشی بہ دنت، مالی ءُُ انتظامی کار آنی واستہ بزنس پلان زوت ترتیب دیگ بہ بیت۔ آئی ءَ اے گپ چار شمبے ءِ روچ ءَ پاکستان ٹیلی ویژن ءِ کار آنی ھوالگ ءَ دیوان ءِ سروکی ءَ کنان ءَ کت۔ دیوان ءَ وزیر ءِ اھوالکاری ءُُ شنگ کاری چوہدری فواد حسین، ھاسیں کمکار نعیم الحق، افتخار درانی، ندیم افضل گوندل، چیئرمین پی ٹی وی ارشد خان، سیکرٹری وزارت اھوالکاری ءُُ شنگ کاری ءُُ کلانہ ایں اپسرگ آں بھر زوری کت۔ چیئرمین پی ٹی وی ارشد خان ءَ پی ٹی وی ءِ انتظامی ءُُ مالی کار آنی سرءَ سرجمیں بریفنگ دات۔ مزن وزیر ءَ بریفنگ ءِ ساھت ءَ گوشگ بوت کہ پی ٹی وی ءِ وڑیں راجی شنگ کاری ادارگ ءَ را اے وھد ءَ مالی جیڈھ ءِ گوما ایندگر جتا جتائیں نمونگ ءِ جیڈھ ءُُ جنجال است اِنت ایشانی کار رپک، پروڈکشن ءُُ جوانیں چیز آنی پیدوار ھوار اَنت۔ گوست ءِ مالی ھرابیں انتظامی ءِ بدولت ءَ اے وھد ءَ ادارگ ءِ زمہ ءَ 5.8 ارب کلدار ءِ وام است اِنت پنشن ءِ مد ءَ 14 ارب کلدار ءِ وام ءَ ابید اَنت۔ نیٹ ورک ءِ اپ گریڈیشن ءِ واستہ گیش 1.2 ارب کلدار ءِ لوٹ اِنت اے موہ ءِ سر ءَ مزن وزیر ءَ گوشت کہ پی ٹی وی یک ارزشتی ایں ادارگ اِنت ایشی ءَ پاکستان ءِ پجار ءَ را سہرا کنگ ءَ کلیتی کرد پیلو کتگ۔ بدبھتی ءَ گوستگیں زمانگ ءَ ایشی ءَ را ایوک ءَ سیاسی مول ءُُ مراد آنی ھاترا کارمرد کنگ بوتگ۔ مزن وزیر ءَ پنت ءُُ شون کت کہ پی ٹی وی ملکی پجار، راجی مڈی ءُُ پاکستانیت ءَ را سہرا کنگ ءِ سر ءَ ھاسیں دلگوشی بدنت۔ مزن وزیر ءَ گوشت کہ سرکاری شنگ کاری ادارگ ءَ مالی بد انتظامی ءِ سزا اچ رنگ ءَ الس ءَ دیگ نہ بیت۔ آئی ءَ پنت ءُُُ شون کت کہ پی ٹی وی انتظامیہ ادارگ ءَ را مالی رنگ ءَ وتی پاد آنی سرءَ اوشتگ ءُُ وتی مالی وام آنی گر ءُُ دار ءِ واستہ دلگوشیں پلان ھڈ بہ دنت اے موہ ءِ سرءَ ایم ڈی پی ٹی وی ءَ پی ٹی وی ءِ مزور آنی نیمگ ءَ ھشتاد لکھ کلدار ءِ چیک ڈیم فنڈ ءِ واستہ مزن وزیر ءَ را دات۔
