اسلام آباد۔ 23جنوری (اے پی پی) وزیر خارجہ شاہ محمود قریشی پارینے کہ پاکستان کودک کشمیری تیا بھارتی بیدادی نا برخلاف تینا توار ءِ ہر کہول آ بڑز کرسا کرینے و کرسا کیک۔ کودک کشمیری خاص کر زالبول و چناتا قربانی تے زیان مننگ کن الیپنہ۔ کشمیری الس تون یکجہتی نا درشانی کن ، یوم یکجہتی کشمیر، ءِ پبی وڑاٹ اڈتننگ نا فیصلہ ءِ کرینن۔ داہیت آتے او کشمیری راہشون آتا چار باسکی ڈل اسے تون گپ و تران کرسا پارے ہرافک چارشنبے نادے آ وزارت خارجہ ٹی اوڑتون اوڑدہی کریر۔ وزیر خارجہ پارے کہ پاکستان مقبوضہ کشمیر اٹی بھارتی بیدادی ءِ غٹ جہانی فورم تیا چست کرینے و چست کرسا کیک۔ کودک کشمیری خاص کر زالبول و چناتا قربانی تے زیان مننگ کن الیپنہ۔ اوپارے کہ کشمیری الس تون یکجہتی نا درشانی کن ، یوم یکجہتی کشمیر ، ءِ پبی وڑاٹ اڈ تننگ نا فیصلہ کرینن۔ کشمیری راہشونک کشمیر نا ویل ءِ اقوام متحدہ تون اوار اہم جہانی فورم آتیا چست کننگ و اقوام عالم نا چکار ءِ دا ہم انگا ویل انا کنڈا کرفنگ آ وزیر خارجہ نا منت واری ءِ ہرفیر ۔ شاہ محمود قریشی پارے کہ مقبوضہ جموں و کشمیر نا حالیت آک بگڑینگسا ہِننگ ءُ۔ اوپارے کہ اقوام متحدہ نا ہیومن رائٹس کمشنر نا رپورٹ و ساڑی آ دے تے ٹی مون آ بروک آ ، ایلو بے کنڈ ہلوک آ رپورٹ آتا لب لباب ہم ہمودے ، ہرا بھلو وخت اسے آن پاکستان نا موقف چلینگسا بننگ ءِ۔ اوپارے کہ نن صدر اقوام متحدہ جنرل اسمبلی ماریہ فرنینڈا اسپینوزا تون ہم ہندا خواست ءِ کرینن کہ مقبوضہ جموں و کشمیر نا ویل ءِ یو این سلامتی کونسل نا قرارداد آتا رداٹ بایدے ایسر کروئی مرے۔ پاکستان ، کودک کشمیری تیا مروک آ بھارتی بیدادی نا برخلاف تینا توار ءِ ہرکہول آ بڑز کرسا کرینے و کرسا کیک۔
