اسپیکر قومی اسمبلی اسد قیصر تون چندی ملک آتا سفارت خانہ غاتے ٹی تعینات اتاشی تا اوڑدہی
اسلام آباد۔ 23جنوری (اے پی پی) اسپیکر قومی اسمبلی اسد قیصر تون پاکستان اٹی ساڑی چندی ملک آتا سفارت خانہ غاتے ٹی تعینات اتاشیک اوڑدہی کریر۔ اوڑدہی ٹی اہم علاقائی و جہانی معاملہ و چندی ملک آتا پاکستان تون تعلقداری تیا گپ و تران کننگا۔ داوخت آ اسپیکر قومی اسمبلی پارے کہ پاکستان اسہ پرامن ءُ ملک اسے و غٹ ملک آتون دوستانہ تعلقداری جوڑ کننگ آ باور کیک، پاکستان اٹی زرکاری نا بھلو وارخواہی اس ارے ہرافتیان پیشن نا زرکارآک فائدہ ہرفنگ کیرہ۔ اوپارے کہ ساڑی حکومت ملک اٹی زرکار دوست پالیسی درستی راستی کرفنگ ءِ و زرکارآتے کن سرمایہ ءِ رکھ فراوان کننگ کن گام گیج چست کننگ ءِ۔ اسد قیصر پارے کہ پاکستان اٹی است چکوک قدرتی ندارہ انگا سیل وسواتی ہند و دنیا نا بڑزکو انگا مش ساڑی ارے، پاکستانی قوم و سیکورٹی ادارہ غاک دنیا ٹی امن نا خاطر دہشت گردی نا جنگ اٹ لازوال قربانی تسنو، سفارت کار آک تینا ملک آتے ٹی پاکستان نا جوان دروشم ءِ تالان کننگ اٹ کڑد ادا کیر۔ داوخت آ درملکی اتاشیک پاکستان نا قومی اسمبلی نا دورہ غا میزبانی آ اسپیکر قومی اسمبلی نا منت واری ءِ ہرفسا پاریر کہ قومی اسمبلی و کانود سازی نا بابت ننے بھلو معلومداری اس دوئی مسنے۔
