اسلام آباد۔ 23جنوری (اے پی پی) بنجائی وزیر امور کشمیر و گلگت بلتستان علی امین خان گنڈاپور پارینے کہ پاکستان و آزاد کشمیر نا تین پہ تینی رشتہ غاتے سوگو کننگ اٹ آزاد کشمیر نا صحافی برادری و ادارہ غاتا بھلو کڑد اسے ہرا تینا ادارہ و مثبت خبرتا کمک اٹ پاکستان و آزاد کشمیرنا الس نا تین پہ تینی رشتہ غاتے سوگو آن سوگو کننگ ءُ۔ او پریس کلب اسلام آباد اٹی آزاد کشمیر نا اسہ علاقائی ءُ اخبار ہرد ے ئی جموں و کشمیر نا سالانہ دود اٹی مہمان خاص انا وڑاٹ تران کریکہ۔ اوپارے کہ ہراوخت آن او وزیر امور کشمیر نا منصب ءِ سنبھالانے او آزاد کشمیر نا صحافی برادری و ادارہ غاتے بے کچ مثبت خنانے۔ اوپارے کہ آزاد کشمیر آن تعلق تخوک آ پرنٹ و الیکٹرانک میڈیا ہراوڑاٹ ایل او سی نا ایلو کنڈآ رہینگوک آ تینا کشمیری ایڑھ و ایلم تا حق انا توار ءِ چست کننگ ءُ او ستاکڑزک و اوفتا دا کڑد آن مقبوضہ کشمیر نا ایڑھ و ایلم تا بے حد است بڈی مننگ ءِ ہرا تینا حق خودارادیت نا ودی دے و روا حق اکن ہفت دہائی آن جان تے ندر کننگ ءُ۔ اوپارے کہ نئے بیرہ دا بلکن صحافت نا بشخ اتون تعلق تخوک آ بندغ و ادارہ غاک آزاد کشمیر نا الس نا ویل آتے ہم پبی وڑاٹ تالان کننگ ءُ و اوفتا تعمیری تنقید آن حکومت ءِ آزاد کشمیر نا ویل آتے ایسر کننگ اٹ بپی کمک ملک۔ داوخت آ بنجائی وزیر مستی پارے کہ آزاد کشمیر نا 1974 ء نا آئین اٹی 13می ترمیم نا بابت ابہام ءِ زوت مرکننگک و دارداٹ غٹ اسٹیک ہولڈر آتون گیشتر سلابت نا چرجوئی برجاءِ اوپارے کہ ہمو گام گیج آتیا باور کیرہ ہرافتیان پاکستان و آزاد کشمیر نا تین پہ تینی رابطہ و رشتہ پین سوگو مرے۔ اوپارے کہ گلگت بلتستان نا الس ءِ پین بااختیار کننگگ نا بابت سلاہ و سوج ہم زوت کیبنٹ دیوان اٹی پیش کننگک۔ بنجائی وزیر پارے کہ آزاد کشمیر اٹی جاری شونداری ڈٹ آک بروخت پورو مریرہ و آزاد کشمیر اٹی دوسد کلو میٹر ٹورازم کوریڈور و میر پورمنگلا مظفر آباد شاہراہ ءِ بروک آ سال پی ایس ڈی پی ٹی اوار کرسا کاریم نا زوت بناءِ کننگک۔ اوپارے کہ آزاد کشمیر اٹی جان جوڑی و تعلیم نا بشخ اٹی آسراتی تے گچین کننگ کن اسہ جاچ سروے اس کننگ انگ ءِ ہراڑان دا بشخ آتے ٹی ساڑی آ آسراتی تے گچین جوڑ کننگ تانکہ آزاد کشمیر نا الس ءِ جان جوڑی و تعلیم نا گچین آسراتی کن بھلا شار تیا ہِننگ نا گرج پیش بف۔ اوپارے کہ بطور وزیر امور کشمیر و گلگت بلتستان دا اونا فرض منصبی ٹی اوار ءِ کہ او آزاد کشمیر و گلگت بلتستان تون پاکستان نا رشتہ غاتے سوگو آن سوگو کے و دارداٹ او تینا کڑد ءِ جوانی اٹ پورو کیک۔ اوپارے کہ اونا درگہ ہروخت آزاد کشمیر و گلگت بلتستان نا الس کن ملوک ءِ و او اوفتا ویل آتے اولیتی بنداو تیا ایسر کیک۔ بنجائی وزیر آزاد کشمیر نا صحافی برادری آن خواست کرے کہ او 5فروری آ یوم یکجہتی کشمیر ءِ پبی وڑاٹ اڈتننگ کن تینا پبی کڑد ءِ ادا کیر تانکہ کشمیر نا ویل ءِ جہانی کہول آ پین تالان کرسا مقبوضہ کشمیر نا ایڑھ و ایلم تے اوفتا حق خودارادیت ترفنگ مرے۔ داکان مست بنجائی وزیر امور کشمیر نیشنل پریس کلب نا پوسکن گچین مروک آ صد ر شکیل قرار و ایلو پوسکن گچین مروک آ عہدیدار آتے مبارکبادی ہم پیش کرے۔
