اسلام آباد۔ 23جنوری (اے پی پی) آزاد جموں و کشمیر نا صدر سردار مسعود خان پارینے کہ آزاد کشمیر اٹی ودوک آ بے روزگاری نا چیلنج اتون مون تننگ کن روایتی تعلیم تون اوار اوار فنی تعلیم المی مسنے، ریاست اٹی ہشتاد ءُ پنچ درسد شرح تعلیم، پنچ جامعہ ، مسہ میڈیکل کالج و پاکستان نا تعلیمی ادارہ غاتیان فارغ التحصیل مروک آ ہزار آ طالب علم آتے آزاد کشمیر نا سرکاری بشخ اٹی ملازمت تننگ ممکن اف، فنی تعلیم و مارکیٹ نا طلب نا رداٹ تعلیم مفننگ نا سوب ننا طالب علم آتا چنکو کچ اس نجی بشخ اٹی ملازمت دوئی کننگ اٹ سرسہب مریک۔ داخیال آتا درشانی ءِ او نیشنل ووکیشنل اینڈ ٹیکنیکل ٹریننگ کمیشن نا ڈائریکٹر جنرل مقیم الاسلام تون گپ و تران کرسا کرے ہرا چارشنبے نادے آ کشمیر ہاؤس اٹی اوڑتون اوڑدہی کرے۔ صدر سردار مسعود خان پارے کہ سی پیک نا رداٹ چندی شونداری ڈٹ و حکومت آزاد کشمیر نا تینا شونداری ڈٹ آتے کن درکار افرادی قوت نا مانگ ءِ پورو کننگ کن حکومت آزاد کشمیر اسہ کنڈ تینا تعلیمی ادارہ غاتے ٹی فنی تعلیم نا کنڈا چکار کننگ ءِ ایلو کنڈا نیوٹیک کون آ ادارہ غاتا کمک دوئی کننگ نا کوشست کننگ ءِ تانکہ ریاست نا طالب علم آتے فنی تعلیم آن آراستہ کرسا اوفتے ملکی و درملکی جاب مارکیٹ آتے ٹی تخنگے۔
