اسلام آباد 22جنوری( اے پی پی) سپیکر قومی اسمبلی اسد قیصر ءَ گوں پاکستان ءَ استیں ایران ءِ سفیر مہدی ہنر دوست ءَ سئے شمبے ءِ روچ ءَ پارلیمنٹ گس ءَ گند ءُُ نند کت۔ گند ءُُ نند ءِ تہ ءَ دو نیمگی یکوئی، پڑ ءِ استیں جیڈھ ءُُ وت مہ وتی واھگی کار آنی سر ءَ ھیال ریچی کنگ بوت۔ سپیکر ءَ پاکستان ءُُ ایران ءِ نیام ءَ دو نیمگی دوستی آنی ھوالگ ءَ دیان ءَ گوشت کہ دوئیں ملک آنی نیام ءَ مھکمیں یکوئی است انت۔ آئی ءَ میاں اوستمانی ءُُ پڑ ءِ استیں جیڈھ آنی رد ءَ دو نیمگی اسٹریٹیجک، تجارتی، اقتصادی ، دود ءُُ ربیدگی یکوئی آنی ضلورت ءِ سر ءَ زور پر دات۔ آئی ءَ دوئیں ملک آنی نیام ءَ ٹوھیں نیک راھی، دود ءُُ ربیدگی یکوئی آنی تران ءَ کنان ءَ گوشت کہ دوئیں ملک آنی تجارتی کساس سک کموک اِنت ایشی ءِ تہ ءَ گیشی ءِ ضلورت انت۔ آئی ءَ گوشت کہ دوئیں ملک آناں وت مہ وتی سیت ءِ واستہ وتی ڈن ءَ چہ سامان آرگ ءُُ برگ ءِ تہ ءَ گیشی کنگ لوٹ ایت۔ سپیکر اسد قیصر ءَ دوئیں ملک آنی پارلیمنٹ ءِ باسکی ڈل آنی آیگ ءُُ روگ ءِ ضلورت ءِ سر ءَ زور پر دات ءُُ گوشت کہ پاکستان ءُُ ایران ءِ پارلیمان ءِ نیام ءَ نزیکیں رابطہ پڑ ءِ برجائی ءُُ یکوئی ءِ دیمروئی ءِ واستہ ضلوری اِنت۔ آئی ءَ گوشت کہ پاکستان ءُُ ایران ءِ نیام ءَ دوستی ءُُ یکوئی پڑ ءَ ایمنی ءُُ دیمروئی ءُُ وشھالی ءِ واستہ المی انت۔
