اسلام آباد۔ 22جنوری (اے پی پی) پاکستان و ترکی نا تین پہ تینی واپار ءِ 2ارب ڈالر اسکان ودفنگ مریک۔ بزنس مین پینل نا بنجائی سیکرٹری جنرل احمد جواد پارینے کہ پاکستان و ترکی نا نیام اٹ آزادانہ واپار نا معاہدہ (ایف ٹی اے) آن نئے بیرہ ہڑتوم آ ملک آتا تین پہ تینی واپار اٹی خاطر خواہ ودکی مریک بلکن داڑان ترندی اٹ بدلینگوک آ جغرافیائی و سیاسی جہانی منظر نامہ غاہم جوان ءُ زہم اس تمک ۔ سے شنبے نادے آ ’’اے پی پی‘‘ تون خصوصی گپ وتران کرسا احمد جواد پارے کہ پاکستان و ترکی نا تین پہ تینی تعلقداری مدام گچین مسنے و خاص کر ہڑتوم آ ملک آتا دودوربیدگی تعلقداری تا تاریخ بھاز متکن ءِ۔ اوپارے کہ دنیا نا چندی ملک آتا واپاری ڈل آک پاکستان نا دورہ ءِ کننگ ءُ و پوسکن گچین مروک آ حکومت تون چندی بشخ آتے ٹی ہڑتوم آ کنڈآتا کمکاری ءِ مون آ دننگ نا پوسکن ءُ کسر پٹنگ ءُ۔ اوپارے کہ ترکی و آذربائیجان مدام کشمیر نا ویل آ پاکستان نا موقف نا پبی مخ تفی ءِ کرینو وخت اس کہ ترکی کشمیر نا ویل انا ایسری کن واک انا کاریم اٹ اتنگ نا جاگہ غا مذاکرات و سفارت کاری نا کمک اٹ جھیڑہ نا چٹفنگ نا پاکستانی موقف نا ترندی اٹ تائید ءِ کیک۔ احمد جواد پارے کہ گدرینگوک آ منہ سال اٹی ترکی نمان معاشی شون ہلکونے ہرانا جہانی کہول آ است بڈی ءِ کننگک۔ اوپارے کہ پاک ترک ایف ٹی اے تون تین پہ تینی واپار ءِ مون آ دننگ و واپاری نسخان ءِ کم کننگ اٹ کمک رسینگک۔ بزنس مین پینل نا سیکرٹری جنرل اسہ سوج اسے نا ورندی ٹی پارے کہ ایف ٹی اے آن ہڑتوم آ ملک آتا تین پہ تینی واپار ءِ آسانی اٹ 2 ارب ڈالر اسکان ودفنگ مریک ہرانا ساڑی آکچ 650ملین ڈالر ءِ۔ احمد جواد پارے کہ ہڑتوم آ ملک آک ہڑتوم آ کنڈآتا واپار ءِ مون آ دننگ کن کسٹمز و ریگولیٹری ڈیوٹی تیٹی 85درسد اسکان کمتی آ امنا ءُ ولے معاہدہ ءِ گڈیکو دروشم اس ترسا داڑا عملدرآمد نا زوت آن زوت گرج ءِ۔ اوپارے کہ ہڑتوم آ ملک آتا واپاری تنظیم تے ہڑتوم آ کنڈآتا واپار اٹی ودکی کن کڑد ادا کننگ نا گرج ءِ ہراڑان نئے بیرہ کاروباری رابطہ غاتے ٹی ودکی مریک بلکن تین پہ تینی واپار نا مون آ دننگ آن قومی معیشت نا شونداری نا درکار ہدف آتا دوئی کننگ ءِ ہم المی جوڑ کننگ مریک۔
