اسلام آباد۔ 22جنوری (اے پی پی) اقوام متحدہ نا جنرل اسمبلی نا صدر ماریہ فرنانڈا اسپنوزا پارینے کہ اقوام متحدہ نا باسک ملک آتا جہانی امن ءِ حقیقت جوڑ کننگ کن سیاسی عزم بے کچ اہم ءِ، چاگڑدی بدلی تا اثرآتون مون تننگ کن جہانی کہول آ اجتماعی کوشست آتا گرج ءِ۔ جھیڑہ غاتیان زہمی دنیا نا چندی علاقہ غاتے ٹی پاکستان نا کڑد ستاکڑزک۔ او داڑے انسٹیٹیوٹ آف اسٹریٹجک سٹڈیز اٹی پبلک ٹاسک آن تران کریکہ۔ دود آن انسٹیٹیوٹ نا ڈائریکٹر جنرل اعزاز چوہدری ہم تران کرے وخت اس کہ اقوام متحدہ ٹی پاکستان نا آخبتی مندوب مدیحہ لودھی، مسکوہی سفیر آک، دانشور و خارجہ پالیسی نا چاہندار آک ہم بشخ ہلکر۔ اقوام متحدہ نا جنرل اسمبلی نا صدر پارے کہ اقوام متحدہ منہ جہانی واک آتا تنظیم اس اف، گڑاس وخت غٹ بھاریم آتے اقوام متحدہ غا بٹنگک، درحقیقت ننتون ہچ ءُ جادو نا چھڑی اس اف، یمن نا جھیڑہ ٹی پنچ سال آن کم وئی نا 80 ہزار چنابین نا سوب آن تپاخت کریر۔ اوداڑا است ہسونی نا درشانی ءِ کرسا پارے کہ باسک ملک آتا قومی فائدہ بسا اوقات اقوام متحدہ نا بنداوی فائدہ غاتیا حاوی مریک۔ اوپارے کہ داہیت انا ادراک ءِ بایدے کروئی مرے کہ اقوام متحدہ نا کڑد کمکار و پول انا ءِ ہرادے او فعال وڑاٹ کننگ ءِ، مشکل آتا باوجود یمن اٹی سیز فائر و معاہدہ غاتا دروشم اٹ مثبت پیش رفت کرینے، غٹ کڑدہ غاتا کنڈآن تینا وعدہ غاتے پورو کننگ نا گرج ءِ۔ کشمیر نا ویل آ تینا موقف نا اعادہ ءِ کرسا اوپارے کہ ہر جھیڑہ نا پائیدار ایسر اس پٹنگ کن پرامن مذاکرات اہمیت تخک۔ ہراتم اوڑان سوج کننگاکہ اقوام متحدہ 70 سال آن کشمیری تتون کروک آ وعدہ غاتے پورو کننگ اٹ غیر موثر ءِ انت اکن ءِ؟ ہرانا ورندی ٹی اوپارے کہ دا اقوام متحدہ نا وعدہ نا بابت آخا بلکن دا جہانی برادری نا عزم انا بابت ءِ و اونا کڑدہ غاتا کنڈآن ہرممکنہ کڑد انا بابت ءِ۔ اقوام متحدہ نا امن مشن نا کمک اٹ جہانی امن کن پاکستان نا کوشست آتا ستاءِ کرسا اوپارے کہ جھیڑہ غاتیان زہمی دنیا نا چندی علاقہ غاتے ٹی اونا کڑد ستاکڑزک۔ اوپارے کہ چاگڑدی بدلی تا اثرآتون مون تننگ کن جہانی کہول آ اجتماعی کوشست آتا گرج ءِ ، پاکستان تون اوار چندی ملک آتے شدید پِر و جلاب و کاخت سالی مون تروک ءِ۔
