اسلام آباد۔ 21جنوری (اے پی پی) صدر مملکت ڈاکٹر عارف علوی پارینے کہ حکومت زرکاری ءِ مون آ دننگ، واپار اٹی آسانی، روزگار نا وارخواہی و مینو فیکچرنگ بشخ انا ترند تر شونداری نا کمک اٹ نجی بشخ آتے مون آ دننگ کن سنبرینگوک ءِ۔ اوداہیت ءِ پاکستانی کمپنی ’’ایمریلی سٹیلز‘‘ نا چیئرمین عباس اکبر علی تون گپ و تران کرسا پارے ہرادوشنبے نادے آ داڑے اوڑتون اوڑدہی کرے۔ صدر داہیت آ زور شاغاکہ معیشت نا بحالی حکومت نا اولیت ءِ ہرا واپار اٹی آسراتی تننگ کن ہرگام گیج ءِ چست کننگ نا تہیہ کرینے۔ اوپارے کہ تیار مصنوعات آتے ٹی زرکاری ننا معیشت نا بحالی نا لائف لین ءِ ہراٹی ملک ءِ مسابقانہ سبقت دوئی ءِ۔ اوداہیت آ زور شاغاکہ غٹ چیلنج آتا باوجود ساڑی حکومت ملک اٹی زرکاری ءِ اتنگ کن سازگار چاگڑد اس ودی کننگ کن سخت خواری کننگ ءِ۔ اوپارے کہ صنعتی بشخ ءِ پوسکن آ دور انا ٹیکنالوجی ءِ بایدے کاریم اٹ اتنگے تانکہ دانا گنجائش و آب پین بڑز مرے و داٹی ملک انا برآمد آتے ٹی ودکی مرے۔
